Blog, Laimi Caah, Open Letters

Lai mino hna hi an Khrihfabu chung cio ah hmunhma an ngei maw?

October 19, 2017

Mino Sunday lai asi cang le, mino upa hna meeting an thu. An mah le an mah an i zoh le hodah mino sunday ah caan hmang ding asi hnga ti sau ngai te an i ruah. Thawngtha chimtu zawn cu a lawng in an chiah, a ruang cu “Bible sianginn kaimi” hi caan tha pe ve hna usih an ti. An dihlak in an lungtlin bu tein an khrihfabu i Bible sianginn kaimi pakhat kha an thim. Bible sianginn kaimi mino te cu aa nuam tuk le a cauk vialte a van kau dih, a khup aa bil i Bawipa sinah lawmhnak bia a chim. Bible ca caang cu a zoh len i a hnu cem ah cun khrihfabu caah a siaherhmi tete hna kha a van i tial. Nu le pa le mino hna biatak tein riantuan tti khawhnak dingah mah hi thawngtha hi kan herh cem ko lai a ti. Mino Sunday ah cun a suit le a necktie aa hruk bal lomi te kha a nu nih a van pek i a chungkhar hna zong an i lawm tuk.

Pulpit cu a van phan le a tha a thir. A laiholh a chuak kho ti lo. A thin a phang. A holh a rang chin thluahmah. Upa hna nih cun an let-peih bu tein an zoh ko. Bible sianginn kaimi mino te cu mirang holh tete a van telh thluahmah cang. A note a zohnak ah ho he hmanh eye-contact a tuah kho ti lo. Bible sianginn a kai i a cawnmi vialte a van hman ko nain, mipi thinlung a laa kho lo. Mino caan hman ni asi tikah, caan le a sau tuk cang i mipi zong nih pumh dih in zei rawl kan ei lai ti lawng te an hngak cang. Nau fa tete aunak aw nih phunchimtu aw cu a van khuh thluahmah. Ka dih a hau pah cang a ti i rang ngai in minute 30 ah cun a chim duhmi a chim dih.

Pumh dih ah cun mino hna nih hman an thlak pi i na thawngtha chimmi a tha tuk an ti. Upa hna zong nih zeitluk in dah hmailei ah a biapit dang an chimh pah bu in a kut an tlaih.
Bible sianginn kaimi kan mino te cu inn ah a lawi i mah hi maw Bawipa riantuan asi ati i ai lawm ngai. Thawngtha a chimmi le a dangdang a tuah khawhmi kha a ruat i a lung cu a tling bak lo. A caan ngah than ning law cu hi bantuk tete hi kai remh bak lai ti ruahchannak te he a Bible le notes hmai te ah a thu. Zeitik ahdah thawngtha chim caan tete zong ka ngah than khawh te hnga ti aa ruahchan khawhmi caan cu a hmaikum Youth Sunday ni lawng khi asi. Mah hmanh cu an khrihfabu chung in Bible sianginn kaimi dang an um lo asi le, an mino Chairman a piangthar tuk i thawngtha chimnak caan a lak lo ah cun amah pek than te ding asi hnga.
Upa hna bia an i ruahmi a nu nih a theihmi cu “tuchan mino hna hi laiholh zong an thiam ti lo. A chim cu an chim ve cio ko hna nain ngaih awk zong an tlak lo. Ti hin cun hmailei ah zei kan lawh te hnga kan thei lo” ti asi. A nu nih a hna tu ai phih i a fa ca tu ah thla a cam piak. A fa cu a lung rawk sual lai tiah zeihmanh a chim lo.  

Kan khrihfabu cio ah hi bantuk tete hi Bible sianginn mi nih nan ton cio lai tiah ka zumh. Lai mino U.S. ah Bible sianginn a kaimi kan tam tluk in hman kan si lo caah, Pathian rian ah kan i pek khawh hnga tluk in kan i pe lo. Pathian riantuan zia le Pathian biachim zia kan thiam khawh hnga tluk in kan thiam fawn lo.

Lai mino Bible sianginn a kaimi an harnak

Khua tampi kan ruah ding ah ka ruahmi cu “Laitlang lei in pastor dang kan cah ti hna awk asi maw” tihi a si. Hi bia ka ttial tikah hin aho ho Khrihfabu tiah ka ttial hnawhmi an um lo. Laitlang lei pastor hna cu kei ka upat tuk hna, a ruang cu thlacamnak bak in Pathian rian a tuanmi an si. Rumnak kawl loin Bawipa pennak a kawlmi an si. Kan mino hna nakin hruainak lei zongah experience tam tuk a ngeimi an si caah an mah sin in cawn ding tam tuk kan ngei rih.

Amah belte cu, Laitlang lei in pastor kan cah hna tikah hin ahopaoh nih kan theih cio bantuk in Visa siseh, a dangdang lei a herhmi tampi khi Khrihfabu cio nih liam a hau, tuah a hau. An phanh hnu zongah American culture le sining kha biatak tein theih an i zuam i Bawipa caah an si khawh chungin an i pe ve. Khrihfabu hruainak ah U.S. kan kal ning tam tuk aa dangmi um tikah an i harh ngai. Khrihfabu chungah rian biatak tein a tuanmi cu mino an si. U.S phung le lam lei hoih in a tthangmi mino an si tikah Laitlang lei cahmi pastor nih pakhat le pakhat he i pehtlaihnak ah an i harh ngai tawn.

Ruah awk ngai pakhat asi mi cu, hi ka ram ah Bible sianginn kai i Pathian riantuan a duh mi Lai mino kan tam ngai cang. CBCUSA chung hmanh ah B.Th le M.Div a kan lak piak kho cangmi hi minung 10 cu an um cang lai. A kai liomi cu kan tam chinchin. Hi hna hi teh Khrihfabu ah hmunhma pakhat khat an ngeih ve lo ah cun zei rian dah an ttuan lai ti hi ka ruat ngai. Kan nau le te hna hi sianginn an kai lio ah siseh an dih hnu zongah siseh an mah le Khrihfabu chung cio ah thawngtha chimnak le a dangdang in caan pek lengmang an si ko lai tiah zumhnak ka ngei. Asinain, nan duhning tluk in nan lung an in ton hna lai ka zum tuk lo. Ziaza in siseh, biachim holhrel zong in siseh, nan lung an in ton hna zong ka zum tuk lem lo. A ruang cu, sianginn kan kainak hi mirang sianginn asi bantuk in kan cawnmi ca hi mirang holh in asi. Doctrine lei siseh, theology lei siseh, phungchim daan zong ah siseh mirang sin lawngte in cawnmi an si tikah khrihfabu cio ah kan i tel i hruaitu kan ttuannak zongah nu le pa hna ah a luh khawh lo ding tiang in biachim caan zong tampi a um ko lai. Atu tiangah hin mino tampi cu a leng lei lawngin rian an tuan tikah khrihfabu chung thilri an thei kho tak lo. A chung taktak an luh lo tikah thinlung taktak he pek duhnak le thazaang dihlak van chuak hi an i harh ngai.

Nu le Pa sinah nawlnak

Nan fa nau le nan duh ning tluk in kan fim lo tikah nan lung kan in dongh caan hna a tampi ko lai. Mah hi maw an Bible sianginn kaimi cu a si nan kan ti tawn ko lai. Nan ti zongah a cheu cu ti phu tlaak cu kan si tak ko. Kan theih cio bang in ahohmanh a thiam cia in a chuak mi kan um lo. Mirang sianginn i kan cawnmi hna hi Laimi sinah caan voikhat tinnak lawngah an hman tikah a har ngai te.

Keimah kai zoh ve tik ahhin Bible sianginn ka kai thok kaa ahhin Pathian hi ka rak duh tuk ve. Laimi kan cawlcangh daan hi ka lungtling lomi a rak tam ngai. Ka biachim zongah zainak deuh lawngte an rak si.  Thawngtha ka chim tikah ahhin mirang phungchim dan in ka rak chim tawn i, mirang holh zong telh pah in thuk ngai le kau ngai in ka rak chim. Nu le pa nih ngaih zong an i harh i ka chim duhnak zong fianh an rak i harh ngai tawn.  Cu pin ah Laiholh in van chim ti ah ka lei le ka dang nih a pek lo tikah a har ngai te. Pakhat te kai lawmh tukmi cu ka Khrihfabu nih an ka dawtnak thawng in  kum (4) chung Khrihfabu ah ka cawlcanghnak ahhin thlakhat ah voikhat hrawng thawngtha chimnak caan ttha an ka pek. Zarhte zaan pumh ah siseh, topinak ah siseh, lawmhnak thlacam ah siseh caan an ka pek tawn tik ahhin kai lawm tuk. Minung sinak cun ka rak ttih tuk. A ruang cu Laiholh ka thiam lo mi hi an theih cio, keimah zong nih kai theih ve tikah ka sining nih a phan lo. Pathian bia ka duhning in ka chim khawh lo tikah caan tam deuh cu ka tha a chia. Sihmanhsehlaw, caan tam deuh an ka pek tikah kai zuam chinchin. Anmah lei zong nih theihthiamnak an ngeih ve tikah kum khat hnu kum khat kan i pehtlaihnak hi a ttha chin lengmang tiah ka hmuh khawh.

Ka langhter duhmi cu kan nau le tete zong hi hruaitu sinak dirhmun kan pek hna lo i experience ttha deuh an ngeih khawhnak dingah ttuanvo kan pek hna lo ah cun zeitik hmanhah hin kan Khrihfabu cio caah hman awk an tlak lai lo. Hman khawh zong an si lai lo. A tuan zong an huam lai lo. Nu le pa tu nih ungsau bu tein zohkhenh zia le cawnpiak zia le hman zia nan thiam a hau. A caan nan kan pek a hau fawn. Kan nau le ai pemi an tam tuk ko buin Laitlang lei pastor lawngte kan cah hna tikah, hmunhma an ngei ti lo.   

An chim tawnmi cu Laitlang lei pastor a tthattha kan timi kan cah hna tikah Laitlang lei aho nih dah a hruai hna lai ti hi a si. Hi ca ka tial tikah Laitlang lei in pastor cah hlah usih ka ti duhnak asi lo.

Ruat hna usih ti ka duhmi cu mah ka lei a um mi Bible sianginn a kaimi kan nau le tete hi Laimi sinah rian an ttuan khawhnak hnga le an i pek khawh deuh nak hnga biatak tein lam kan sial piak hna a hau ti hi asi. Laitlang lei i a thiam le a fimmi pastor lawngte auh kha ruah colh loin, hi ka ummi hna kan fa le kan nau le hi Khrih ah an thancho khawhnak hnga zei bantuk in dah khua kan khan piak hna lai ti ruat deuh usih ti ka duh. 

Bible sianginn kaimi mino hna caah kan tuah khawhmi

  1. A cheu khat ka theihmi cu hmunhma tam an ngeih lo tikah, soiselnak tam tuk an ton tikah, Laimi sinah ttuan loin, miphun dang sinah a ttuanmi an um. An palh ka tinak asi lo. Kanmah Laimi kan sinak nih hin Pathian rian tampi kan ttuan khawh dingmi a um ko. Experience an ngah khawhnak hnga ding ah hmunhma pe kho hna usih law ti ka duh.
  2. Khrihfa upa hna le pastor hna nih thazaang pek kan herh. Mirang holh in “discipleship” tiah an timi asi i, Bawi Jesuh hruaitu ttha si khawh ding tiang cawnpiak i kan hruai hna a hau. An palh caan zongah lungsau tein kan hngah hna i thlacam le dawtnak he lam kan ser piak hna a hau.
  3. Crusade le cawnpiaknak tawi tete zongah a lenglei minthangmi lawng sawm siloin khrihfabu pawngkam cio ah Bible sianginn kaimi tete sawm hna usih. Cawnpiaknak thuk tuk le a sau tuk zong asi a hau lai lo. Nu le pa caah asi lo hmanhah tuchan mino hna caah sawm khawh an si ko.

Mirang khrihfabu cio zongah mah hihi an ton lio mi asi ve, http://www.christianitytoday.com/news/2017/january/only-1-in-7-senior-pastors-is-under-40-barna.html  Mirang pastor hna cu kum 70 cung an tam tuk cang le a hngakchia deuhmi pastor an tlawm tuk cang an ti ve. Training pek takmi an um lo tikah hruaitu si ding an um ti lo i hruaitu thar kan tlawm tuk cang an ti ve.

Moses nih hruaitu asi nak kha Joshua sinah a pek bantuk in, Elijah nih Elisha chiti a thuh bantuk in, Paul nih Timothy kha cakuat in a cawnpiak bantuk in, Bawipa nih kan lai mino hna hi kan nu le kan pa hmang in a sunparnak caah rak kan hmang ko seh.

Facebook Comments

You Might Also Like

No Comments

Leave a Reply

%d bloggers like this: