Blog, Laimi Caah

Laksawng Petu A Nawl Zulh Kan Herh

September 27, 2017

Free Guitar for fire

Voikhat cu guitar ser a thiam tukmi pa pakhat nih mi sifak tukmi hna chungkhar kha bawmh a duh tuk hna caah, a tha tukmi guitar pakhat a pek hna. Hi guitar hi nan i chiah lai i ka sinah guitar tum nan cawng pah lai. Mah ti cun nan fanu maw nan fapa nih tangka kawl hna seh tiah a lak-ka in a pek hna. An chungkhar nih cun lawm tein an cohlan i guitar cu an inn ah an i chiah. Nain, voikhat cu an inn a kik tuk caah guitar cu meiphu to nak ding caah an khangh.

Laksawng cu laksawng asi ko. “Free” in pek cu a si ko. Nain, Laksawng a petu nih aa ruahchanmi kha a cotu nih an tlinh lo tikah an nunnak caah hmual a ngei lo.

Free, with our own purpose

Tuchan minung hna cu, laksawng timi cu a lak-ka in ngahmi asi caah kan duhnak paoh ah hman khawh asi tiah kan ruah. Mah bantuk za-lawnnak a um lo asi ah cun laksawng taktak asi lo kan ti. Lak-sawng in mi pakhat nih a kan pek ah cun a cotu nih a duhnak paoh ah a hmang awk asi ko ti hi vawlei mipi tampi nih an aupi mi asi.
Bianabia ah, wedding kan kal tikah mi tampi nih tangka in laksawng kan pek hna. A ruang cu an duhnak ah hmang hna seh kan ti. Tangka $100 kan tialmi chung ah “mah hi coffee dinnak lawng bak ah nan hmang lai” tiah tial usih law monu le mopa an i lawm tuk lem lai ka zum lo. Nain “Home Depot $100” gift card kan pek hna asi ah cun Home Depot bak lawngah hi laksawng hi hman khawh asi ti an theih. Pathian vel le dawtnak hi teh “tangka $100” bantukin duhnak paoh hman ding maw asi hnga? Asi lo le “Home Depot Gift Card $100” bantukin dah hmannak hmun theihter in pek kan si?

Free, but with God’s purpose

Bible ca chung i Pathian nih laksawng a kan pek tikah mah ti hin kan ruah ve rua ka ti tawn. Pathian laksawng a kan pekmi hna hi kan hman lo, asi lo le hman kan huam lo, asi lo le a duh ning in kan hman lo asi ah cun, Pathian laksawng a co lomi he kan i lo ko. Solomon cu Bawipa nih a ram hruainak ah rumnak le fimnak a pek nain a mah nuamhnak ah a hman. Samson cu Bawipa nih ram biaceihtu ah tthawnnak a pek nain, amah le amah cawisan dingah a nun chung a hmang. Bible ca chungah hibantuk minung hna hi an tam tuk caah “warning” pek kan si peng.

Jesuh Khrih sin in a rami khamhnak cu a lak-ka asi, tuahsernak a tel lo. Efesa 2:8-9 Nannih cu vel an ngeih hna caah an khamh hna i khamhnak nan hmuh cu amah nan zumhnak thawngin a si. Khamhnak nan hmuhmi cu nanmah tuahmi a si lo, Pathian laksawng a si. Hi kongah hin nan i porhlawt khawhmi zeihmanh a um lo, zeicaahtiah nanmah ṭuannak thawngin nan hmuhmi a si lo. Pathian vel timi cu zumhnak thawngin Jesuh Khrih chung in pek kan si. Mah bal te cu, Pathian nih a kan peknak aruang a um i mah caah cun hman ding kan si. Zumhnak thawngin khamh kan conak cu Fapa Jesuh Khrih muisam kan kennak hnga asi! A taktak ti ah cun Pathian laksawng le thluachuah vialte hi Jesuh Khrih muisam kan ken khawh nak hnga pekmi kan si.

Khamh kan conak le Pathian fa si khawhnak cu i chiah sawhsawh ding ah pek kan si lo. Midang sinah vai porhlaw ding ah pek kan si lo. Duh caan lawngah Pathian thangthatnak caah pek kan si lo.

Pathian vel hi kan cohlan tak ah cun Pathian duh ning in kan nun a hau. Kan nunnak a thar caah a man cu pek piak kan si cang nain, Pathian duh ning in nun ding ah sawm kan si. Paul nih cun Filipi 2:12 ah Nan khamhnak a tlin khawh nakhnga, ther le phang lengmang in ṭuan ko u. Nan khamhnak caah tuan uh a ti duhnak asi lo, nan khamhnak a tlin khawh nakhnga ti duhnak cu… khamhnak Bawipa sin in kan co mi hi amah duhnak in kan nun hlan lo cun a tling lo tinak asi. Mirang holh cun “work out your salvation” tiin asi i, nan khamhnak kha excercise tuahter uh a ti duhnak khi asi.

Guitar ai dawh tak le a man fak tak mi kha a hman in hmang loin voikhat te lumnak ding caah a hmangmi cu mi hruk asi. Cu bantukin vawlei ah man sunglawi bikmi Pathian fa sinak a comi hna nih Pathian fa kan sinak thluachuah vialte hi hmang loin voikhat nuamhnak ca men te ah Sehtan duhnak le pumsa duhnak kan zulh peng ah cun mi hruk kan si ve.

Free, for God

  1. Na nunnak ahhin Pathian laksawng a cohlan zia na thiam maw van i check hmasa.
  2. Khamh na si nak le Pathian fa na si nak hi lunglawmhnak lawng in maw na donghter asi lo le na nunnak ah an lang maw (Mi na ngaithiam maw? Mi thlei dannak na ngeih maw? Na hmurka na bichim nai sum maw?)
  3. Zing chiar te Thiang Thlarau sinah a dawtnak a lianngan zia hi ka theihter ti hi thlacamnak tuah.
  4. Rocotu na sinak kha nai philh lonak hnga, Bible carel dai thlang hlah. Bible ca hi by-heart in ciah khawh asi cun a tha cem.
  5. Pathian pennak hi a kau chin lengmang nak hnga zeitindah kai tel khawh ve lai tiah Thiang Thlarau hi biaruah peng.

Israel mi hna cu Egpyt ram in khamh an si. Khamh sawhsawh in khamhmi cu asi lo. Bawipa thangthat ding i a zumlotu hna caah “Pathian miphun” hna hi zeidah an lawh tiah langhter ding caah asi.
“Zeitintiah nannih cu Bawipa nan Pathian caah miphun thiang nan si; Bawipa nan Pathian nih vawlei cung i a ummi miphun vialte chungin nannih cu amah ro caah an thim cang hna.” Deut 7:6

Facebook Comments

You Might Also Like

No Comments

Leave a Reply

%d bloggers like this: