Laimi Caah, Open Letters

Khrihfabu thanchonak ding thil phun 5.

February 9, 2016

Kan khrihfabu cio kan zoh tikah zeidah kan ruah ning cio asi hnga? Nan lung ai lawm maw? Pathian nih teh a lung ai lawm lai ti nan ruat maw? Bible ca nih a chim ning tein a nung mi asi maw?

A cheukhat khrihfabu cu kan i tthen i a cheu cu buainak in kan khat. A cheu cu Pathian ni lawng ah kan i tong. A cheu cu pumh lio ah kan laam i a cheu cu dai tein kan i pum. A cheu cu member tampi kan ngei i a cheu cu tlawm te lawng kan ngei. A cheu khrihfabu cu mino tampi nih choir an sak lio ah a cheu ah cun upa deuh lawng te nih an rak sak ve.

Khrihfabu kip kan zoh tikah, pakhat le pakhat kan i dang cio hna. Kan i danmi hi a ttha lomi cu an si lo. Kan i danmi nih hin Pathian zeitluk in dah a ngan timi tu an langhter deuh. Natein, kan khrihfabu hi Pathian nih a lawmhmi khrihfabu asi maw ti cu ruah peng a hau. Pathian a duh ningin a nungmi asi lawng ah khrihfabu timi sullam cu a ngei lai. Khrihfabu member tam le tam lo, choir sak thiam le thiam lo, mi an laam le laam lomi nih khrihfabu zei asi ti tam tuk a chim lem lo. Cu ti asi ah cun, kan khrihfabu cio hi, Pathian duh ningin a tthangmi khrihfabu asi ko ti kan hngalh khawh lai?

A dangdang ka chim hlan ah kan khrihfabu ah ka hmuhtonmi thil a cangmi pakhat van langhter ka duh. Voikhat cu, kan khrihfabu ah Bible ca nih a chimmi khrihfabu a lawhnak te ka hmuh tikah khrihfabu a tthanter kho tu Bawipa cungah lawmhnak ka chim. Mah cucu.. Kan khrihfabu member pakhat, ruah lo piin sizung a phan. Minute 15 chung a rak thi cang ko nain, Pathian nih a nunnak a zuah tthan caah, cu ti cun, thluak phing bu le thaw pek chom in sizung ah a um. Pathian nih member chungtel cung dihlak ah rian a ttuan i, mizaw inn ah ni 7 chung i tong in thlacamnak kan ngei tti hna. Pathian bia in thazaang i pe in Pathian sinah bawmhnak kan hal. Kan pek khawhmi tangka le thliri in a chungkhar kan bawmh hna. Lamkaltu 4 (Acts 4:27-31) hi ka lawhter tuk. Taksa lei cun kan ba ngai ko nain, thlarau lei cun kan tthawn lio caan te asi. A buai cu kan buai ngai ko, nain buaipi awktlak pakhat asi tiah ka hmuh. Biakinn program ah kan buai mi a dang tampi an um ko nain, buaipi awktlak ngaingai mi an tlawm.

Voikhat cu mizaw zoh dingah sizung cu ka phan i, kan khrihfabu nubu upa pakhat, mizaw pawng ah Bible a rel ko kha ka hmuh. Mizaw nih cun a thei kho lai ka zum lo, sihmanhsehlaw Pathian bia a tthawnnak kha ruahchannak he thlacam pah in Bible ca cu a au in a au hnawh. Khrihfabu chungtel dangdang zong nih chun zaan in an rak zoh. Kan mizaw tlawmpal a van cawl, a thaw a van dawp i a thintur a ran deuh hmanh ahhin “Hallelujah, Bawipa na ttha tuk, na dam ter cang lai” tiin Pathian tthawnnak hmuh lawng an hngak. Si ko, miphun dang mithmuh ah cun mihrut kan lo ko. Natein, Pathian tthawnnak hmuh duh cu a sual maw? Pathian nih a ttha a ti ah cun damnak a pek khawh lai ti zumhnak in kan khat. Bawipa cu thangthat si ko seh! Mizaw cu a dam le lam zong a kal kho cang. A thluak tu neurosurgeon nih tha tein an zoh piak lio asi. Thlacamnak in rak bawm ve dingin kan nawl hna.

A cunglei ka van tialmi hi, Pathian ttawnnak le riantuannak bianabia, kan khrihfabu chungah a langmi asi i a dangdang zong nih nan khrihfabu cio ah nan hmuhtonmi tehtekhan ding nan ngei cio lai tiah ka zumh. U le nau hna, khrihfabu hi asi ding ning tein asi tikah ai dawh tukmi thil asi. Pathian muisam a kenter tu, dawtnak a luan in a luannak hmun ah ai cang. Ahohmanh kan tlamtling lo bu ahhin “Bawipa zeidah tuah seh ti na ka duh?” ti chimduhnak lungput a chuak. Kan nih kan khrihfabu zong nih a tlinh kho pet maw? A tlinh kho pet lo. Nain, a tlinkhawhnak dingah a riantuan buin thlacam ding cu kan si maw? Kan si bak ko. Khrihfabu timi hi a biakinn hmun le a min lawng an si bak lo (laimi khrihfabu cu B le C lawngte). A min sawh lawng siseh law cu lai biakinn hna hi faphir lawngte kan si hnga. Biakam thar kan zoh tikah, khrihfabu timi cu Khrih chungah a nungmi minung hna tu hi a chim duhmi asi deuh. Chim duhmi cu, nangmah le keimah hi khrihfabu tak cu kan si. Khrih kan zumhnak in Thiang Thlarau a chungah a ummi paoh hi Khrihfabu kan si. Kan mah pum in sak-tti mi hmun hi khrihfabu cu asi. Zumtu cu zeitik hmanh ah a mah te lawng um phung asi lo. Zumtu timi cu a dang pakhat, pahnih, pathum… he um tti i Pathian lei ah tthan tti hi asi. Khrihfabu chungah Pathian bia in tthan tti, dawtnak ngeih tti, ngaihthiam i zuam tti, Pathian pennak kawl tti, vancung ah chawva khawn tti le hawikomhnak ser tti hi Bawipa nih a kan duh piakmi asi. Khrihfabu chung hmanh ah hi hna kan tuah khawh lo ah cun, a dang chinchin cu chim ding an um lo.

Hi thil pa nga hi Pathian thawngttha a hngal takmi khrihfabu nih an ngeih ding asi:

1. Pathian biaknak leiah biatak tein a nungmi (Colossians 3:16; 2 Tim 4:2). Praise and worship that ti lawng siloin Pathian bia ah biatak le thuk tein a lutmi an si hau. Pathian bia hi a sangcem upatnak pek asi lai i nawlngeihnak a ngei cemmi cu Pathian bia asi lai. Cu pin ah Pastor le cawnpiaktu lawng nih Pathian bia hngalh siloin, member pakhat cio zong nih an mah tein a thuknak kawl zong an thiam lai. Mah ti asi tikah cun, zei bantuk program an tuahnak kipah Pathian bia he kalh lo tein an i hruai thiam lai.

2. Pathian khamhnak thawngttha a au pimi (Acts 4:21). Zeitindah kan khrihfabu chungtel hna nih Pathian thawngttha hi an hngalh khawh lai tihi biatak tein a zohmi an si a hau. Bianabia ah, program phunkhat hna a that deuh lo ah cun a dang program hi a tha deuh hnga maw ti thlacam bu tein zoh pah a hau. Hngakchia, upa, nubu, mino dihlak nih zeitindah khamhnak an hmuh khawh lai ti khuaruat khomi an si a hau. Khamhnak cu Pathian ta asi ko, nain, tu lio ai thleng cuahmah mi vawlei ahhin, kan unau hna nih zeitindah thawngttha hi an hngalh khawh cem lai ti cu thlacam buin ruah a hau.

3. Pathian fa si ruangah vawlei nunning in a nung lomi (1 Peter 1:14). Chantiluan nih cun a hmanmi biatak um ti lo, nangmah na duh ning paoh in nung ko law a ti hmanh ah, zumtu hna cu Bawipa duh ningin a nungmi kan si lai. Vawlei mi hna nih lih an chim, an fir, an in ngaithiam kho lo, nu le pa sualnak an tuah, hmanh ah Pathian mi hna nih cun kan nunzia in thawngttha chim ding kan si. Pathian mi hna nih midang caah an ngeih lomi an caan an pek tikah, an ngeih lomi tangka an hlut tikah, an dawt khawh lomi hna an dawt hna tikah, ngaihchia mi hna an bawmh hna tikah, Pathian dawtnak cu a lang khun.

4. Pathian an zumhnak nih an tuahsernak (zuamnak) a thlenmi (1 John 2:3-6; Ephesians 5:1-2). Pathian khamhnak nih minung thleng loin a um bak lo. Thiang Thlarau cu khamhmi minung chungah a um tikah hin a nunnak ah a lang. Cu bantuk khrihfabu cu an mah caah an nung ti lo i Pathian sunparnak le ramkuahnak caah an nung cang. Zumhnak le Pathian riantuannak in an kal tikah khrihfabu cu ai dawh i vawlei mi hna nih ceunak an hmuhnak asi.

5. Pathian duhmi zaangfahnak le a dingmi thil tuahmi (Micah 6:8; Rom 12:13-16). A dikmi rian (justice) hi phun tampi an um. Natein, a buaktlak in chim ah cun, vawlei cungah a hman lomi thil hna doh hi an si. Pathian nih vawlei a rak ser ningin a hmanmi thil le a dingmi thil kalpi asi. A hman lo ruangah mi pakhat thong a tlak ah cun, khrihfami hna nih a caah a dikmi phunglam kawl piak ding asi. Rian a kawl kho lo i rawl ei ding a ngei lomi asi ah cun, zaangfahnak lungthin he, si khawh ningin bawmh ding asi.

Hi thil pa nga hi tuah ai zuammi khrihfabu cu an tthang ko lai. Hi bantuk in tuah ai zuammi khrihfabu ah kan um ah cun a ttha tuk. Natein, hi bantuk hi a ruat lomi kan si ah cun, biatak tein khuaruah ding asi. Laimi cu US ah har tukin kan nun tikah, kan rian umnak hmun pawng a ummi Khrihfabu paoh ah kan um hna nain, Bible ca ningin nun ai timmi khrihfabu pawng tu ah um i rian kawl ding tu kan si deuh. I thial lawng hi a hmasa cem ah ruat loin, kan khrihfabu hi keimah nih zeitin tel in Khrih nih a duh ningin a nungmi khrihfabu asi khawh lai ti kan ruah ding asi.

Southern Baptist Theological Seminary i President asi mi Albert Molher, Jr. nih a chimmi cu “If you can’t tell the difference between the church and the culture, it isn’t that the church has been victorious over the culture, it is because the culture has been victorious over the church” hi asi.

Vawlei mi hna nih ser chommi phunglam le kan khrihfabu cio nih zulhmi phunglam an i dan lo asi ah cun, khrihfabu kan sung tinak asi. Pathian nih a sakmi khrihfabu cu Pathian a dotu vawlei he cun ai dang bak ding asi.

A chungah khan kan khrihfabu kong tehte ka van tial mi ah khan, a cheu cu Pathian nih mizaw a damtermi kha khuaruahhar cemmi thil ah nan ruah hnga. Mah nakin khuaruahhar deuh tiah ka hmuh mi cu, a hlan ah mah le mah ai daw cem i mah zawn lawng ai ruatmi le ngeihmi caan hmanh ah kai zaa lo ai timi hna kha, Thiang Thlarau nih an chunglei in a thlen hna tikah, mizaw le chungkhar caah zeitindah ka bawmh khawh hna lai a timi hna hi an si deuh. Mizaw an dammi nakin, Pathian nih kan cungah khuaruahhar rian a tuan peng ko ti kan hmuh khawh pengmi cu, Pathian nawlbia zulh in midang kan dawt khawhmi hna hi asi tiah ka zumh.

Kan khrihfabu cio hi Pathian nih siseh ti a kan duh piakmi khrihfabu kan si khawhnak hnga thlacam peng ko usih. A chanbaunak na hmuh khawh ah cun, a ttha tuk. Kha bantuk chanbaunak ah khan Bawipa nih an hman duh. A chanbaunak na hmuh khawh mi kha na thluachuah asi.

Facebook Comments

You Might Also Like

No Comments

Leave a Reply

%d bloggers like this: