Music

Pathian Thiang Thlarau (Kan in Sawm Ko) – Emily Ngun Hlei Sung

January 19, 2016

Khrihfa kan si tak asi ah cun, Thiang Thlarau kan chungah a nung i a um. A kan umpi mi tu hi hngalh kan hau. Kan nunnak ahhin Khrih muisam keng dingah zeidah a kan duh piak ti hi kawl kan hau.

Nifate in, Thiang Thlarau sawm ding kan si kan ti tikah hin, Thiang Thlarau a um lo ruangah kan sawm tinak asi loh. Thiang Thlarau a um ko mi kha, kan thlarau mit a cawt tuk ruangah, kan tep kho lo i kan hmuh khawh lo mi tu kha asi. Thiang Thlarau kan in sawm ti cu, “Pathian na hmaiah toidornak he kan ra ko, kan chungah a herh na ti mi rian rak tuan law, na duh bangin kan ser ko,” tinak asi.

Thiang Thlarau nih cun:

  • Chim ding kan theih lo caan ah chim ding a kan pek. “a caan a phak tikah chim awk ding cu pek nan si te ko lai, cucu chim te ko u (Mark 13:11; Luke 12:12).”
  • Jesuh Khrih sin in thawnnak, fimnak, daihnak he kan khahnak ding caah a kan bawmtu asi. “Bawipa kha ṭihzah ngaiin an um i Thiang Thlarau bawmhnak thawngin an ṭhang i an karh (Lamkaltu 9:31; Johan 14-16; 1 Kor. 2:9-10; 1 Johan 5:6-8).”
  • Pathian thawngtha kha a nunter i thawngtha a chimtu kha thawnnak a pek hna. Pathian bia hngalh khawhnak lawng siloin, Khrih Jesuh he i neih chin dingah a kan hruai. (Lamkaltu 1:8; Rom 8:26; Efesa 3:16-19)
  • Sualnak le thihnak chung in a kan luatter i Khrih he pehtlaihnak thawng in zumtu hna cu nunnak a kan pek. “Zeicahtiah Khrih Jesuh he aa pehtlaimi nunnak a kan petu Thlarau phung nih cun sualnak le thihnak phung chung khan a ka luatter cang (Rom 8:2).”
  • Sehtan/sualnak sal sinak in luatnak cu a kan pek i Pathian fa ah a kan canter. “Pathian nih an pekmi hna Thlarau cu sal i an canter ṭhantu hna ding thlarau a si lo, ther lengmang le phang lengmang i nan rak nunning ah an kalpi ṭhantu hna ding zong a si fawn lo. Pathian fa ah a kan sertu ding tu kha a si i amah nih cun Pathian kha, “Ka Pa, ka Pa,” tiah a kan auhter khawh (Rom 8:15-16).”
  • Misual kan si kan rak i theih lo caan te khan misual kan si kha a kan hmuhter i Khrihfa kan si hnu zongah nifate in kan ruahning a kan cawnpiak. “A rat tikah vawleicung mi kha sualnak an ruahning le zeidah a ding ti an ruahning le Pathian nih bia a kan ceih lai ti an ruahning i an palhnak kha fiang tein a hngalhter hna lai (John 16:8).”
  • Nunnak le luatnak cu a kan pek i ruahchannak he a kan nunter. “Sihmanhsehlaw Khrih cu nan chung i a nun ahcun sualnak ruangah nan pum cu thi hmanh hna seh law nannih cu Pathian he nan i rem cang caah Thlarau cu nan caah nunnak a si (Rom 8:10; 2 Korin 3:17).”
  • Pathian i a khrihfabu thatnak caah zumtu pakhat cio laksawng pek kan si. “Thlarau kan chung i a um kha phun khatkhat in a lang cio i cucu kan dihlak ca i ṭhatnak ding caah khan a si (1 Korin 12:7).”
  • Thlarau theitlai cu zumtu kan nunnak ahhin hmuh khawh asi. “Sihmanhsehlaw Thlarau nih a chuahtermi hna cu: dawtnak, lawmhnak, daihnak, lungsaunak, zaangfahnak, ṭhatnak, zumhawktlakmi sinak, toidornak le mah le mah i tei khawhnak tehna hi an si. Cu bantuk thil hna caah cun nawlbia zeihmanh a herh lo (Gal 5:22-23; 2 Korin 3:18).”

MP3 download: http://noisetrade.com/vabc/pathian-thiang-thlarau-kan-in-sawm

Pathian Thiang Thlarau (Kan in Sawm Ko) Lyrics

1. Hi tluk man sung lawi, khuaruahhar thil um lo
Tahchunh khawh si lo, ruahchannak sung bik
Na ka um pi

2. Ka teh le ka hmuh, a thlum cem na dawtnak
Ka thlarau cu a luat i ka ningzahnak a tlau
Na ka um pi

Cho: Pathian Thiang Thlarau, Kan in sawm ko
Hi hmun ah i phuang law, run khat hrim ko
Na sunparnak hmuh kan thin nih an hlam
Na hmai ah ttam, haal, in kan hun ra, Bawipa
(Na hmaika ah)

Bridge:
(Na kan um pi mi, rak kan hngalh, ter chin leng mang
Na sunpar thawnnak rak kan hmuh ter, maw Bawipa) x3

Facebook Comments

You Might Also Like

1 Comment

  • Reply Henri January 27, 2016 at 9:30 pm

    Awesome video and song !!!
    i like the addition of the verse! I wish I knew what verse tho…. 😀

  • Leave a Reply to Henri Cancel Reply

    %d bloggers like this: