Laimi Caah, Nunnak Changreu

New Year, New Mercy

December 31, 2015

Caan tampi cu minung hi kanmah le kanmah kan i hleng tawn. Acaan ahcun kan i hlenmi hmanh kan i thei tawn loh. Hi vawlei nih a chuahpi mi paohpaoh hi cu a ttha lei kap a panh kho lo, a tthing i lak awktlak lo ah ai chung peng ko. Fak deuh in ka ttial ahcun, nunnak hmanh hi a rawp i lak awktlaklo ah ai chuah tawn. Khuasik thla ah kan i hruk tawnmi kan angki leng a ttha ttha hna kha, kumkhat hnu kumkhat cun, kan bizu a tawlei kap ah chiah an si tawn. Motor thar kan i cawk le kan i cawk ka ahcun, a tthing kho ti lo ding ah kan ruah tawn, sihmanhsehlaw kumkhat kumhnih a van rauh cun, a ttawl hmanh kan huam tawn loh. Inn ngeimi zong nih carpat thar tete an van thlen tikah, an tlen tlawmpal ahcun a thianh hlim an huam ngai nain, a seh mi tete a van um pah ahcun, an huam ti loh.

Van ttial ahcun ttial ding lawng te a si ko, ka tial hnawh duh channak cu, vawlei cung ahhin cun zeipoh hi an tthing i, a ttha lo lei kap lawng te an panh peng ko. Minung kan si ah, thil ri a si ah, a tthing lei kap kan panh dih ko. A tthing lei kap a panh kha kan i ziak tuk cang tikah, a ruah awk kan hngal tawn lo i kanmah le kanmah kan i hleng lengmang tawn hna. Thil kan cawk ah kum 10 hna a kan nguh ahcun kan i nuam ngai ngai tawn. A hmun zungzal lo mi thil nih kum tam nawn a van kan khan tikah cun kan i nuam ngaingai tawn hna. Caan tampi cu hi a hmun zungzal lo mi thil ahhin, kan zeizong te chuah in kan ttuan i, a hmun zungzal lo mi thil kha kan i lawmh pi hna i, phorhlawtnak ah kan hman i, kanmah lila zong kha mah nih cun a kan tthin ter ve i, a kan hrawh tawn.

Sihmanhsehlaw, Pathian fa na si ahcun a tthing i, a chia peng lo mi thil pakhat a um. Nikhat hnu nikhat a tthin i a chiat cu chim hlah, nikhat hnu nikhat a thar peng, cucu hihi a si, “Bawipa dawtnak a fekmi cu, a dong hrimhrim lai lo, A zaangfahnak zong a cat lai lo; Zing fate in an thar lengmang, Zumhtlak a sinak cu a lianngan hringhran.” (Tahnakhla 3:22-23)

Nifa tin kan nun hi sualnak le palhnak in kan khat peng ko, a zaangfahnak le a bawmhnak hi zingfa te kan herh peng ko. Kan thazaang le kan fimnak nih a phak lomi thil hi kan ton peng ko, a zaangfahnak le a bawmhnak hi zingfa te kan herh peng ko. Pathian zaangfahnak le vel cu zeitik hmanh ah a tthing cang le hruk awk a ttha ti lo ti a um bal lo, kan caah thazaang thar a si peng i, nunnak thleng tu a si peng.

Zeitluk hmanh in kan sualnak va tam sehlaw, zingchiar te kan caah ruahchannak thar le thazaang thar a si pengmi a vel le a zaangfahnak cu penh peng ko hna usih. Nang le kei kan caah zeidah lawmh awk a tlak taktak mi cu a si? Kum Thar a si hrim loh! Kan caah a thar peng mi a vel le a zaangfahnak hi a si ko. Nang le kei nih kan i ruahchannak le kan nunnak hi, Kum Thar le Thilri ah siloin, Jesuh Khrih lawnglawng ahhin si ko seh tiah kan sawm hna.

 

Facebook Comments

You Might Also Like

No Comments

Leave a Reply

%d bloggers like this: