Laimi Caah

Christmas Sullam

December 23, 2015

Tukum cu kum dang bang, mitpurh fodawn in kum chiar te ka hmuh pengmi, Rockefeller Center ah a ummi Christmas tree nganpi zoh ding in kai va thawh than. A hmun cu ka va phan i Christmas boruak hoih in buai curh in mi an i chawhkalhnak ah cun kai va kalh chih ve. Christmas tree nganpi hmaiah cun ka dir ko nain ka zohmi nih ka thinlung la loin tutan cu ka pawngkam mipi huham tu nih ka thinlung an ka lak deuh. Christmas tree a zohmi hi lengluang lakah hin, minung pa zeizat caah dah Christmas hi sullam a ngeih hnga? Kei teh ka caah zei sullam dah a ngeih? Nangteh, na caah zei sullam dah a ngeih?

Na nunnak ahhin Christmas voi zeizat dah na hman cang? Zeitindah Christmas na hman/lawmh? Christmas timi biafang na theih ah zei khi dah na lung ah a ra hmasa bik i na mitthlam ah a cuang hmasa bik? Na caah zei bantuk sullam dah a ngeih?

Kum fatin te December thla kan van phanh cun dawr kipah Christmas inn ttamhnak phunphun le dawhdawh lawng te nih tukum kan inn/biakinn zeitindah kan ttamh hnga ti’n khua a kan ruahter. Cu lawng hlah, TV le newspaper zongah, “the perfect Christmas gift” timi caw-ngia phunphun nih tutan cu, ka nu/pa, ka unau hawikom, ka nungak/tlangval zei bantuk laksawng dah ka pek hnga ti’n kan lung a kan buai ter. Cun khoika kan kalnak kipah Christmas hla le muithlam lawngte an cuan tikah kan lungthin a hlip-hlau ter kan ti. Khuakip um chungkhat sahlawh i ton thla asi rih fawn i mi tam deuh cu December thla kan i ngeih dih hna. Cuticun, inn ttamhnak, laksawng le chungkhat sahlawh rualchan i ton lai i ngeih tuk le buai ngai in kan um lio ah, Christmas a sullam taktak (the true meaning of Christmas) hi kan kheng loin kan nganh sual tawn.

December thla le Christmas cu, micheu khat chungkhar tling lomi, mah pumpak pakhat lawng ramdang phan hna caah cun a fawi lomi asi ve. Mi tampi caah cun chungtling in i ton caan asi bantuk in micheu caah cun a thar in chungkhar hlam tthannak a rak si ve. Asinain, Pathian nih zeiruang ah a fapa ngeih chun caw rawleinak kuang ah a chuahter ti kan hngalh ah cun, kan ngeihchiatnak le lungretheihnak vialte an tlau dih ko hnga. Isaiah 7:14 chungah kan hmuhmi cu“…fa a hrin lai i a min ah Emmanuel sak asi lai.” Cun Matthew 1:22-23, “Emmanuel ti cu Pathian kan sinah a um tinak asi” a ti. Zeitluk vawlei lei in chungkhar he i then hmanh hna usih law, Thlarau leiah cun, Emmanuel Pathian he zeitik hmanh ah kan i then lo. Pathian biakam asi.

Cu lawng si lo, kan Bawipa Jesuh Khrih kha mirum chungkhar sinin a chuak kho ko. A ngaingai te ah cun, caw rawleinak kuang ah a chuah a hau lo. Innkhan pakhat khat a lawngmi a um hrim ko lai. Riahnak hmun zeihmanh an rak lawn lo zong kha Pa Pathian khuakhannak lawng te an rak si. Zeiruangah? Pathian nih a kan dawt tuk caah asi. A rum tuk ko mi kha nangmah le keimah caah sifak ah a cang (2 Corinthians 8:9). Nangmah le keimah zawnruah tukah a nauta biknak hmun caw rawleinak kuang ah a chuak. Aw a sunglawi tuk ee! A sunglawi tuk ee, Bawipa dawtnak! Cucaah i lawm ko hna usih. Khoika kan umnak hmanh ah Pathian laksawng le biakam, Emmanuel Pathian kan sinah a um zungzal ko ti philh hna hlah usih. Kan sualnak chungin a kan khamhtu Jesuh kha kan ngeihchiatnak vialte chaan in kan hawikom tha bik ah ser hna usih! A sunglawi tukmi laksawng Pa Pathian nih a kan pekmi hi a sunghlawih zia thiam hna usih!

Cucaah nu le pa, unau hawikom hna, kan lung in “December thla cu kan Khamhtu Bawi chuah thla le Christmas cu Jesuh chuahni asi” ti kan theihmi lawngah i za hna hlah usih. Atu cu a hngalh hrim in hngal cang hna usih! Christmas kan lawmhnak chan cu “Pathian fapa, Jesuh Khrih kan sualnak chungin a kan khamhtu, Emmanuel Pathian kan sinah a kan umpi ding chuahcam” asi. Pathian cu kan sinah um peng ding ah a rat bantuk in atu zong hi kan sinah a um ko ti hi thei peng ko hna usih. Cucaah zeidang (vawlei thil) kongah lungbuai in um loin Jesuh Khrih chuahcam zeitluk a sunlawi zia tu ruat/thei ko hna usih. Kan lungkil tein tukum Christmas cu “zeibantuk laksawng dah Jesuh ka pek khawh lai” ti ruat bu tein, lunglawm tein Bawipa Jesuh Khrih chuahni hmang hna usih. Christmas lawmhnak le daihnak nan cungah um ko seh!

Facebook Comments

You Might Also Like

No Comments

Leave a Reply

%d bloggers like this: