Nunnak Changreu

Khuaruah harnak pin lei ah!

April 24, 2015

“Jesuh cu Lanhtak Puai chung i Jerusalem khua i a um ah khan mi tampi nih hmelchunhnak a tuahmi kha an hmuh caah amah cu an zulh” (Johan 2:23)

Jesuh nih hmelchunhnak le khuaruahharnak a tuahmi pawl zoh tikah zei hi dah hi hmelchunnak le khuaruaharnak a tuahmi nih hin a sawh duh ti hi philh a awl te. Johan a ngan 9 ah Jesuh nih a chuah ka in a mitcaw mipa kha a damter tikah; a zultu pawl nih, “Mitcaw in a chuahtertu hi a ho sualnak dah a si? Amah sualnak maw si a nu le a pa sualnak dah?” tiah an hal. Cun Matthai 12 chung zongah, Jesuh nih a kut a zeng mipa a damter tikah, Pharisee pawl nih Jesuh sual puh ding in an kawl colh. Pharasee pawl cu Jesuh nih khuaruahharnak hi zeiruang ahdah a tuah le hi a tuahmi nih hin zeidah a langhter timi nakin Sabath ni i khuaruahar a tuahmi ah khan an lung a tling lo deuh.

Zultu pawl le Pharasee pawl bantukin hmelchunnak le khuaruaharnak tuahmi tiang lawngah ai zaa mi si loin, hmelchunnak le khuaruahharnak a tuahmi hnu lei ahhin ahodah um le ahodah a tuahtu si ti hi kan kan hngalh zungzal awk si. Jesuh nih khuaruahharnak le hmelchunhnak a tuah duh channak cu; a zawmi, a mit cawmi, a kut zengmi pawl damter theng kha si loin, cu vialte zong cu an ttha tuk ko nain, cu nakin a biapi deuhmi cu Amah Jesuh kan theih khawhnak ca le a nun kan neih khawh nakhnga tu ah an si.

Ti kha mitsur hang ah a rak cantertu pa nih zeihmanh a si lomi zumtu kha bochan awkthlak zumtu ah a tu zongah a canter. Nga pa 2 le changreu hlum 5 in minung 5000 rawl a rak dangtu pa nih khan, a tu zongah tlawmte a simi thil kha tampi ah a chuahter lengmang rih ko. Lazarus thihnak in a rak thawhtertu pa nih a tu zong nunnak petu le thawhtthannak neitu a si rih ko. Cucaah U le nau hna, Jesuh nih midang nunnak le kan nunnak ah zeidah a tuah timi tiang lawng ah ai zaami si loin, a tuahtu pa amah bak kha thei hna u sih law,kan nunnak ah a zungzal in a kan umpinak hi kan hngalh lai i kan theih khawh zungzal lai.

Khuaruahharnak tiang lawngah nai zaa sual maw?

Facebook Comments

You Might Also Like

No Comments

Leave a Reply

%d bloggers like this: