Nunnak Changreu

Thinlung a si!

April 17, 2015

Thla nan cam tikah mi depde pawl nih an cam bantukin va cam hlah u. Annih nih cun, mi nih kan hmu hna seh, tiin pumhnak inn chung i dir riangmang i cam le zatlang lam tonnak i cam kha an duh. Hihi philh hlah u! Annih cu an laksawng kha tling tein an hmu cang. (Mathai 6:5)

Kan tuahsernak le cawlcanghnak si loin, kan lungput hi Pathian nih a kan zoh mi asi. Kan Khrifa nun hi lenglei i kan cawlcanghnak le lenglei i kan tuahmi thil sawh lawng hi si sehlaw cu, inn ka kan i khar khumh i Pathian sin i thlacam kan i timh tikah, cam awk hmanh kan thei hnga lo. Minutes panga hrawng kan camah, cam ding kan thei ti hnga lo le, kan maak lengmang hna, zeicahtiah Pathian he pumpak in i pehtlaihnak taktak kan neih lo ruangah asi. Sihmanhsehlaw, kan thinlung put a hman i, kan thinlung put ah lenglei i kan tuahmi thil vialte cu Pathian sunparnak caah an si ti kan theih tikah, kan i nuam i, hnangamnak he kan khat i, kan tuahmi thil kipah lunglawmhnak kan nei. Pathian nih hin kan thinlung put tu hi zeidang vialte nakin theih a kan duh deuh mi asi.

Hi kong hi, Jesuh nih hi ka zawn Mathai 6 chung ahhin fiang tukin a kan cawnpiak. Mi depde pawl bantuk in thla nan cam tikah pumhnak inn chung i dir riangmang in le zatlang lam tonnak kip ah cam kha duh hlah uh a ti, zeicahtiah cu bantuk minung pawl nih cun, an laksawng kha tling tein an hmuh cang a ti. Cu bantuk minung pawl nih an duhmi cu, minih a fel tuk, a ttha tuk, Pathian a bia tuk rak ka ti hna seh ti kha an duh i, an duh mi cu tling tein an hmu ve ko a ti. Cu bantuk cu, lenglei i kan tuahmi le kan cawlcanghnak zong hi minih rak ka thangtthat hna seh, minih ai pe tuk rak ka ti hna seh timi ruahnak le thinlung put kan neih ahcun, kan laksawng cu tlamtling tein kan hmuh tak ve ko lai. Sihmanhsehlaw cucu Pathian nih a fale hrangah a kan duh piak mi an si loh, Pathian tu nih cun kan thinlung put kha a zoh. Cucaah, Jesuh nih a zultu pawl kha, inn ka kha i khar khumh in, a thli tein thlacam kha a kan fial. Cu lawng si loin, rawl nan ulh tik zongah, rawl nan ul timi kha mi nih in thei hna hlah seh ti rih. Cucu Pathian nih a duhmi kha a si i, Pathian he i pehtleihnak taktak zong a si fawn. Pathian nih kan thinlung put kha a zoh.

Minung tampi cu, kan tuahsernak le kan cawlcanghnak hi mi nih a kan theih piak lo tikah kan ngeih a chia i, kan tha a baa i, kan tuahmi thil zong kan tuah thai huam tawn lo, Kan i ngol tawn! Sihmanhsehlaw, kan thinlung put kha kan thlen i, ka tuahmi vialte hi Pathian sunparnak ah si ko seh timi thinlung put kan neih ahcun, Kan thinlung ah ngeihchiatnak le mi cungah lungfahnak um lai lo i; Pathian nih pekmi hnangamnak le lunglawmhnak taktak kan nei lai. Pathian nih kan sinin a duhmi cu lenglei i kan tuahsernak le kan cawlcanghnak kha si loin, chunglei i kan thinlung put kha a hmanmi le a dingmi lungput kha nei hna seh ti a kan duh deuhmi cu asi. Cu ti i kan thinlung put a hman i, kan ruahnak kha a dikmi ruahnak si ahcun, Pathian nih a zungzal in bia a kan ruah khawh lai i, kan nunah a sunparnak hmuh khawh a si lai.

Ahohmanh nih an in hmuh lo lio caan i, Nangmah lawng thla na cam tikah, zeitindah Pathian sinah thla na cam?

Facebook Comments

You Might Also Like

No Comments

Leave a Reply

%d bloggers like this: