Nunnak Changreu

A Tho Cang

April 5, 2015

Peter, Fek tein rak ka tlai, rak ka tlai. A ka therh tuk hih. Fek tein rak ka kup. Zei ti um awk ka thiam lo hih. Aw.. Peter, zeidah a cang? Ka mang hlah maw si?

Aw.. Peter, ngai hmanh kan chimh hmanh lai. Kannih nih kan i kenmi cu a ruak kha a thu sual lai tiah zihmui kha lampi ah kan cawk pah i mah kha kan vai kenmi a si ko. Adang zeihmanh kan i ken loh, kan ngeihchiatnak le kan lungretheihnak kan i topi khawhlo tikah cun, amah sin ahcun zingkate, nichuah kate ahcun, thlan ah Mary le Solome le ti-in kan va kal. Mary cu lampi thluan thluan ah ngui ngui thlak thlak in a ttap peng ko. Cu ahcun ruah lopi in a dir i, “Kan molh taktak si, a nun lio zong ah ziah zihmui in kan toih ve hnga lo” a kan ti. Kan celh ve lo i, Solome he cun nguingui tlak in kan ttap ve. Kan mitthli he a nun lio i Khuaruahharnak thil a tuahmi vialte kong kha kan i ruah pah hna. Khua chung lam i, sunpar ngai in, Isareal mi phun vialte nih, “Bawipa min in a ra mi cu thanttthat si ko seh, Hosanna, Hosanna!” tiin an rak au i a kalnak lam vialte le tum hnah le mipi hna nih an puan kha a lam thluan ah an phah piak i, an au nak kong hna kha kan ruah tthan tikah kan celh lo i, zei hme a cang tiin kan khuaruah a har ko. Mi zaw a dam ter, mitcaw a dam ter, mi thi a thawh ter, khuaruah har thil phunzakip a tuahmi vialte kong kan ruah tik ah, kan celh hrimhrim lo, zei sualnak hme a tuah kan ti i, kan pathum cun lampi thluan thluan cu kan mitthli he kan i ruah pah.

Khua leng cu kan van chuak i, “Thlan khar lung kha ahodah a kan thawnpiak te lai,” tiah pakhat le pakhat kan i ceih len. Peter kan chimh mi na ngai maw? Peter ttha tein Ngaihmanh! Thlan kan vun phak cun, an kharnak lung kha a rak i tthial ai! Kan khuaruah a hartuk le kan lautuk ah kan “Ai” i, kan zihmui ken mi cu tang ah kan thlak i, thin tor lengmang in thlanchung ahcun rianrang in kan va lut! Peter na ngai maw? Thlan khar lungpi kha a rak i ong.

Zohhmanh Peter! Nai chingchiah maw?Nangmah nih na kan chimh mi Moses le Elijah cu Jesuh he tlangcung ah bia an i ruah na ti i, cunglei in Aw thawng ka theih na kan ti kha? Nai chingchiah maw, Peter? Atu cu mah kha na chimmi kha kan zumh cang! Awwww Peter, mah kha lio ahkhan zeitindek na rak um ve lai ti kha atu cu ka theih khawh cang!

Peter, ka chim mi hi na ngai ko lo maw? Peter, Ngaihmanh! Thlanchung kan van luh cun mipa pakhat thil thuam rang in a thuammi a rak um, kanmah nih cun kan thei lo, a hmuh zong kan hmu bal lo nain, amah nih cun a kan theih, “Nan thinphang hlah u. Vailam ah an tahmi Jesuh, Nazereth khua mi kha nan kawl ti kha ka hngalh. Sihmanhsehlaw hika ah hin a um ti lo – a tho cang!” a kan ti. Peter? Na ngai maw? A tho cang a kan ti! Cu lio ahcun, a leh awk zong kan thei lo i, ar tthup in a hmai ka ahcun kan dir ko. Tlangval pa nih cun nan ka zum lo maw a kan ti i, an vuinak hmun le Jesuh kan zualnak puan kha a kan piah, va kal u law a zultu hna kha le Peter kha, ‘Amah nih an chimh hna bantuk te khan nan hlanah Galilee ah a kal i cuka ahcun nan va hmuh lai,’ a kan ti.

Peter! Peter! Kan chimh mi cu na ngai maw? Na ngai maw? Va kal u sih! Kan Bawipa cu a tho tthan taktak! Aw.. Peter! A tho tthan taktak! Va kal zokzok hna usih!

“Sabbath ni kha a dih tikah Mary Magdalin le Jeim nu Mary le Salome nih khan Jesuh ruak thuh awk caah cun zihmui kha an i cawk. Zarhpi Ni zingkate, nichuah kate ah khin, thlan ah cun an va kal. Lam ah cun pakhat le pakhat kha, “Thlankhar lung kha ahodah a kan thawnpiak te lai,” tiah an i ceih (A khar cu lung nganpi a si). Cun an hun zoh i lung kha a rak i thawn cang. Cucaah thlan chungah cun an lut i puan rang aa aih i orhlei kam i a rak tthumi tlangval pakhat an hmuh i an lau ngaingai. Cu pa nih cun, “Nan thinphang hlah u. Vailam ah an tahmi Jesuh, Nazereth khua mi kha nan kawl ti kha ka hngalh. Sihmanhsehlaw hika ah hin a um ti lo – a tho cang! An vuinak hmun hi zoh hmanh u. Cucaah cun va kal u law a zultu hna le Peter kha, ‘Amah nih an chimh hna bantuk te khan nan hlanah Galilee ah a kal i cuka ahcun nan va hmuh lai,’ a ti tiah va chim hna u,” tiah a ti. Cucaah an chuak i an thin a phang i an ning a ttih caah thlan cun an le. An thla a lau tuk caah ahohmanh an chim hna loh.” (Marka 16:1-8)

 

Facebook Comments

You Might Also Like

No Comments

Leave a Reply

%d bloggers like this: