Nunnak Changreu

Sabbath Ni

April 4, 2015

Mary, Mary, zahan zaan cu kai hngilh kho bak lo! Nangteh nai hngilh kho ve maw? Kan Bawipa Jesuh kong ka ruah ah ka celh bak lo, ka mang maw si zei hme? A thlan zoh ka va duh tuk e, Biakinn kal hlan ah a thlan va zoh ta usih ca? Ka dua, nizaan ah hme Rom ralkap vialte nih a thlan an congh pet kha, cu fawn lo ah, nihin cu Sabath ni si le kan phung nih a duh lo cu, kan kal ahcun an kan thah colh ve lai tlangbawi upa hna le kan miphun hawi hna nih. Thaizing zingka te tu ah kan kal te lai, tuchun cu Biakinn ah kal in, Pathian bia va ngaih nak le thlacamnak in kan caan va hmang ko usih. Khah, rawl hna van ei, van i tim law ka van in sawm pah lai.

Aw… Phungbia cawnpiak tu saya hna nih, tuchun biakinn ah zeikong ko dah an cawnpiak hna hnga ka ti. Biakinn chung ah zeikong ko dah pakhat le pakhat an i ruah hna hnga ka ti. “Ni zaan i kan thah mi Jesuh kha, Ni thum hnu ah ka tho tthan lai ti le a tho tthan hnga maw?” tiah pakhat le pakhat bia an i hal len men lai. Phungbia cawnpiak tu saya hna nih, “Kanmah cawnpiaknak hlei in midang cawnpiaknak kha pakhat hmanh va zum hlah u” tiah an cawnpiak len men hna lai.

Aw… “Sabbath ni kha philh hlah u, Bawipa caah va hmang u” a ti tu hna an Bawipa cu an philh ruangmaang mu. Sabbath a simi an Bawipa lawnglawng ah dinhnak taktak hmuhkhawh a simi kha philh riangmaang in, anmah tuahsernak khan dinh an i tim mu. Bawipa thil ti khawhnak le tuahsernak ah i din loin, anmah tuarsernak le thil ti khawhnak ah dinhnak kha an kawl, sihmanhsehlaw cu an kawl mi le an tuahsermi ahcun dinhnak taktak kha an hmu lo mu. An thinlung cu thlan khur bang a thu i, ruahnak fih nung hi an nung. Minung hmai ahkhan thangtthat an duh i, an lenglei cu nal zuar in an tuah, sihmanhsehlaw an chung lei cu a thu tuk cang i, lak awk a tlak ti loh.

A thutnak, a muihnak, mi zei taktak hmanh nih um an duhlonak hmun, kanmah kan umnak ding hmun a simi thlankhuar ah Bawipa Jesuh cu kanmah can-ai thihnak a tuar ko. Zeitluk indah a tuar hnga. Zungzal amah he dongcat loin a um tti mi, Pa le Thiang Thlarau he i tthen cu a har ko lai. A celh hrim lai loh mu. Pathian tel loin minute pakhat um cu zeitluk in a har hnga… L Khrih ah u le nau hna, nangmah le keimah, zungzal Pa le Fapa le Thiang Thlarau he zungzal hmunkhat kan umkhawhnak ding hrangah a tuar mi a si.

Bawipa Jesuh, nangmah cu kai dinhnak Sabbath na si caah kai lawm tuk..

Facebook Comments

You Might Also Like

No Comments

Leave a Reply

%d bloggers like this: