Nunnak Changreu

Na Vailamtah cung ah kai lawm tuk..

April 3, 2015

Bawipa Jesuh cu, zaan khua dei a it ti loh. Thir cikcin he Pilat inn ahcun tlangbawi upa hna le phungbia cawnpiak tu saya hna le biaceihtu vialte nih cun an luh pi i, a silomi bia phunphun khan an foih. Maw.. Bawipa, Hruaitu hna nih an thei kho hrim lo mu, Egypt ram i sal an rak tan lio ah, tu bantuk ni ahhin luatnak na rak pek hna kha an thei kho hrim lo mu. Luatnak a rak petu hna Pa kha na lu hloh an in timh cang mu.

Mipi hna le tlangbawi hna cu, kum dang kel te si ahcun, Jerusalem Biakinn pi ah hmunkhat ah lanhtak puai hman ding an si nain tuzing cu Pilat in hmai ah an rak ra pet. Mipi hna nih a luan ciami Ni Ruk ah, Jesuh cu “Hosanna! Bawipa min in a rami cu Pathian nih thluachuahnak pe ko seh” tiin zalam thluan ah an au i, an thangtthat len nain, tu ni ahcun “Vai lam ah tah ko, vai lam ah tah ko” tiin an au chih mu. Sualnak ruang ah thih awk le vailam tah awk a tlakmi Barabbas tu kha na luat ter mu.

Barabbas cu mipi hna nih siloin, Nangmah hrimhrim nih khan na dawtnak thawng in na luat ter. Barabbas cu luat awk a tlak hrimhrim loh. Barabbas nih mipi hna nih Jesuh nak in keimah an ka duh deuh tiah ai ruah sual men hnga, sihmanhsehlaw cucu a si lo. Nangmah nih na dawt tuk ruang ah na luat ter mi a si ko. Aw… Barabbas cu zaangfak a va si dah, nangmah nih luatnak na pek cang nain nangmah cu an zum duh tthiam rih lomu, a nun hlun ahkhan a kal tthan i, nangmah sin ah lawmhnak te hmanh a rak chim lo mu.

Zumtu u le nau hna, caan tampi cu kan nih zong hi Israel mipi hna le Barabbas bantuk kan si. Kan caah a ra mi kha kan hlawt i, kan caah harsatnak a tuar mi kha kan hmuh piak lo i zei ah kan rel tawn lo. Kan caah chiatserhnak a tuar mi kha zeirel loin kanmah nih chiat kan serh chih tawn. Kanmah nih kan tuar hnga dingmi Pathian thinhannak hrai a kan din piak mi kha, zeirel loin kan hnu lei kan chit khenh tawn. Luatnak a kan pek i, vailam cung in “ka fa, kan dawt tuk, zungzal thihnak tuar ding in kan siang loh” a kan ti lio zong ah, kan kal tak i, a cung ah lawmhnak ka khat te hmanh kan chim loh. Aw.. ngaihchia kan si ko.

A ngaingai ti ahcun keimah thi ding ka si, Jesuh si lo in. Keimah hremnak tuar ding ka si, Jesuh si lo in. Sihmanhsehlaw keimah dirhmun kha i lak riangmang in keimah can ai ah a Nunnak a pek. Ka nawlbuar ruangah tem innak a tuar. Ka tthatlonak le dinfel lo ruangah mawhchiat le soiselnak a in cu a si. Ka sualnak ruangah hma a in cu a si. Hremnak a in mi nih daihnak a ka pek i, an tuknak vual in damnak ka hmu. A ngaihchiatnak cu kai lomhnak ah a cang i, a thihnak cu ka nunnak a si!

Facebook Comments

You Might Also Like

No Comments

Leave a Reply

%d bloggers like this: