Nunnak Changreu

Ni Nga Nak Jerusalem Khua Ah…

April 2, 2015

Jerusalem khuapi cu minung cu a khat in khat. Khuate lei i a ummi chungkhat sa hlawh rualchan si hna seh, khua dang i sianginn a kai mi le khualtlawng mi pawl zong an rak tlung pet, zeicahtiah thaizing cu Israel mipi hna nih an i ngaihcem mi Lanhtak puai ni a si cang. Lanhtak puai ni ahcun Tlangbawi Ngan cu hmunthiang ah a lut i, Isreal mipi hna hrangah sual ngaihthiamnak rai a thawi piak tawn hna. Lanhtak Puai lai zaan ahhin chungkhat sahlawh rualchan hmunkhat ah rawl dum ttinak an ngei tawn hna. Mipi hna anmah le an umnak hmun cio ah an i tuai cio hna i, zeitindah kannih chung tuzaan lei rawl kan i hrawm lai le thaizing Lanhtak puai kan hmanh lai tiah an i tuai tam cio ko hna. Jerusalem khuachung ah ai chongmi minung cu an muihmai ah lawmhnak thlam lawngte a leng, sihmanhsehlaw kan Bawipa Jesuh cu lung tuai ngai-in, zeiah a rel lomi minung hna hrangah a nunnak thaizing pek a si ding kong a ruah ah a celh bak loh. A thinlung mithli a luang peng ko.

Tuzaan lei cu Bathani khua lei ah tlung ti loin, a zultu hna he hmunkhat ah Lanhtak puai zaanriah ei tti an i tim, a zultu hna nih khoi ka dah zaan riah kan ei hnga tiah Jesuh cu an van hal tikah, khuapi chung ah va lut u law ti-um aa putmipa pakhat nih a rak in ton hna lai i, Amah inn ahcun hmunkhat ah zaanriah kan ei tti hna lai a ti hna. Zaan lei cu a hung phan i, a zultu hna le Jesuh cu hmunkhat ah rawl an ei lio ah, Jesuh nih nan lak i pakhat nih hin nan ka rawi lai a ti hna. Jesuh nih cu pa cu chuak lo lawlaw in rak um seh law a caah a ttha deuh hnga a ti. Aw.. Judah cu zaangfak a va si dah! A hawikom ttha bik Jesuh cu tangka in a zuar. Hmunkhat zaan riah an dum tti dih cun, Oliv Tlang lei ah khan a kalpi hna.

Israel mipi cu khuachung ahcun biasawng an tlorh i, hawikom le chungkhat sahlawh rualchan he nuam taktak in an um lio ah, Jesuh le a zultu cu khua leng ah ngaihchia ngaiin Gethsemane dum chung ahcun an lut. Dum chung ahcun meiphu an kau i an tthu hna, Jesuh nih Peter le James le Johan kha ai uah hna i tlang ah ai kaipi hna. Tlawmpal an van kal ah khan, Jesuh nih Peter le James le Johan cu a thawh hna i, “Ka lungre a thei tuk hringhran. Cucaah hika ah hin rak um u law hngilh loin rak ka hngak u,” tiah a ti hna.
Hmailei tlawmpal a van kal ah khan a celh ti lo i, a bawk i, a si khawh ahcun harnak khan a luat khawhnak hnga, a Pa sinah thla a cam. “Ka Pa, Ka Pa, nangmah nih cun zeizong vialte na tuah khawh dih ko. Hi hrai hi ka lakpiak ko. Sihmanhsehlaw keimah duhnak bantuk cun si hlah seh, nangmah duhnak bantukin si ko seh,” tiah a ti. Tlawmpal ah a zultu pa thum sin ahcun a van kir tthan i, an rak i hngilh diam. Jesuh cu a celh hrimhrim lo, a tuar mi ngaihchiatnak le fahnak le lungretheihnak cu a zultu hna nih an hmuh piak kho hrimhrim loh, an rak hngilh tak diam. Kan Bawipa Jesuh cu a celh lo tuk i, umtu dan a thiam ti lo i, a Pa sinah hramhram in a hal tthan, “Ka Pa, ka Pa, si khawh ahcun Hi hrai hi ka lak piak ko” a ti. A Pa zong nih a celh hrimhrim lai lo mu. A phurh rit ko lai mu, a hrai chung i ummi cu zeitluk indek a hei hnawmh hnga i, a thut hnga i, a khat hnga mu. (A firmi hna, lihchim mi hna, mithat mi hna, mi rawi hmangmi hna, nu le pa sualnak tuah mi hna, sal hna, zawtnak tthalo ngeimi hna, minih zei ah rel lomi hna, ngun khuai khawl mi hna, Gental mi hna, nu hmei ngakttah hna, tho lung bantukin a thu in a thu cangmi minung) nangmah le keimah sualnak phurh cu a rit ko lai mu.

Khrih ah ule nau hna, zeitindah hi dawtnak hi nang le kei nih ruat loin le lawmhnak chim loin a hmai kan um khawh lai? Nang le kei kan caah kan Bawipa Jesuh nih a tuar mi harsatnak hi zei rel loin um citcet hna hlah u sih, Bawipa Jesuh lawng si loin Pa hrimhrim kha a Fapa nih a tuarmi a zoh tikah a celh lo i, mithli he a khat. Judah bantukin kan Bawipa dawtnak hi tangka men men ah zuar hna hlah u sih. Peter le James le Johan bantukin kan Bawipa nih kan caah a tuarmi harsatnak le ngeihchiatnak hi hngilh tak hna hlah u sih.

Maw Bawipa Jesuh, na cungah ka lung ai lawm tuk, ka lung ai lawm tuk, ka lung ai lawm tuk. Amen!

Facebook Comments

You Might Also Like

No Comments

Leave a Reply

%d bloggers like this: