Nunnak Changreu

Ni Hnih Lawng Ai Duh Cang…

April 1, 2015

Ni thum ni a si cang! Jesuh nih a zultu pawl cu a thawh hna i, “Nan hngalh bantukin, hi hnu ni hnih ah, Lanhtak Puai kha a si cang lai, cun Mi Fapa cu vailam tahnak i khenhchih awkah tlaihter a si lai” tiah a ti hna. Tlangbawi upa hna le Phungbia cawnpiaktu saya hna nih a thli tein Jesuh cu tleih an timh peng rih ko, lanhtak puai hlan ah tleih khawh an duh, a ruang cu puai lio i an tleih ahcun mipi kha an i tuai tuk sual lai ti an phang. Aw.. ngeihchia a va si dah, Jesuh nih Israel mipi hna cu a neih deuhdeuh hna, Israel mipi hna nih an hlat deuhdeuh. A Ni le Caan a van nai deuh thluahmah tikah, mipi hna nih Jesuh cu an duh tak lo i, an hlawt; an hlawt lawng siloin, a nunnak lak piak an timh. Mipi lawng siloin, a zultu hrimhrim nih khan, an rawi i, an zam tak. Ngaihchia a va si dah.

Caan tampi cu Israel mipi le a zultu hna lawng siloin, kanmah hrimhrim zong hi kan si. Kan thinlung Jesuh nih a kan purh deuhdeuh, kan sualnak le kan palhnak a kan hngalh ter deuhdeuh tikah, caan tampi cu thlen kan duh tawn lo. Zumtu tampi cu, kanma nih kan duhnak tiang lawng Jesuh cu Bawi kan si ter tawn. Kanmah nih kan duhlonak, kan siarem lonak, kan tuak khawh lonak le kan hmuh khawh lonak hmun ahcun, Jesuh kha Bawi kan si ter loh. Cu lawng hmanh cu siloin, kan tuak khawhnak le kan hmuh khawhnak hmun lila hmanh ah Bawi kan si ter lo. Kanmah nih kan huam caan le kan siarem caan lawng ah, chikhat te kan thangtthat tawn. Nikhat ah Nizi pa 2 chung hmanh Bawi a si ter lomi zumtu kan tam ko. Phungbia cawnpiak tu le tlangbawi upa hna bang in, kan sining taktak te Jesuh nih a kan hngalhter tik ah, kan i hngalhter tawn loin, Jesuh cu kan kan za tang ah kan chiah tawn.

Zeitindah nikhat ah nazi pakhat manh kan caan ttha Bawipa Jesuh sin ah a pelo mi zumtu hna nih lawmhnak le daihnak hmu cu kan i timh peng nga. Lenglang lawng in Jesuh a dawmi hna nih zeitindah hna ngamnak le lawmhnak hmuh kan i timh peng hnga. A thlawchuah lawng a ruat i a duhmi hna nih zeitindah lawmhnak le daihnak hmu cu kan i timh peng hnga. Hi bantuk zumtu hna cu harsatnak le ngeihchiatnak caan a van phak tikah khan, Jesuh cu an rawi i an zam tak tawn. Sihmanhsehlaw Khrih ah u le nau hna, nang le kei cu minu bantuk in Jesuh cu kan thinlung kan ruahnak kan sining kan thazaang diklak in a daw mi le a biami si ko hna usih tiah kan sawm hna.

Bawipa nih na thinlung dihlak purh in na nunnak an tongh tikah, Bawipa aw kha zei ah a rel lomi si loin, Jesuh cu a tak in na nunnak ah na Bawipa le na Khamhtu siter ko tiah kan sawm.

“Harnak ka in caan a dihlak in a ka umpitu cu nanmah nan si; cun ka Pa nih uknak nawl a ka pek bantukin kei zong nih nannih he biakamnak ka tuah lai. Ka Pennak ah ka cabuai ah nan ding nan ei lai i Israel mi phun hleihnih kha biaceihpiak awkah bawi tthutdan cungah nan tthu lai.” (Luke 22:28-30)

Facebook Comments

You Might Also Like

No Comments

Leave a Reply

%d bloggers like this: