Nunnak Changreu

Jerusalem ah sunglawi ngaingai in…

March 30, 2015

A: Jesuh cu, Jesuh cu

B: Bawi asi, Bawi Asi

A: (Bawipa min in a rami cu)2

B: Thangtthat si ko seh, thangtthat si ko seh!

Tiin, kan hngakchiat lio ah Thantlang khua chungah thinghnah i ken in kan rak au tawn. Philh awk a rak ttha lo, kan rak i nuam taktak. Cu ti kan rak tuah cu, kan Sunday School Saya/Sayamah te nih Bawipa Jesuh Jerusalem khua ah sunglawi taktak in a rak luh i, mipi hna nih an rak don lio caan kha theih hna seh ti duhsak nak in a rak kan tuah pimi a si ko. Ka hngakchiat lio ahcun a tuanbia tiang lawng ka rak theih, sihmanhsehlaw tuni ahcun sunglawi ngaingai in Jerusalem khua chung ah an don mi Jesuh cu pumpak hrimhrim in ka theih cang caah, a tuanbia ruat tthan lo in ka um kho ti lo i, chim lo in ka um kho ti lo i, rel lo in ka um kho ti lo, zeicahtiah ka caah nunnak a si.

Aw.. Minung hi kan va mak hringhran dah ka ti. Kan thinlung hi a va zer hringhran dah. Israel mi pi lawng an si hrimhrim lo, keimah pumpak hrimhrim zong ka si. Chikhat ah ka thangtthat i, chikhat ah ka hlawt colh tawn. Israel mipi hna nih cun, an puan kha an phah i, thinghnah kha an khiah i a kalnak lam ahcun an phah piak i, an thangtthat i, “Hosanna! Bawipa min in a rami cu Pathian nih thlawchuahnak pe ko seh. Kan pu David pennak a ra liomi cu thluachuahnak hmu ko seh! Hosanna! A sang bik van ah khin Pathian cu thangtthat si ko seh” tiin an thangtthat i, upatnak an pek, sihmanhsehlaw ni hnga hmanh a rau lo, Amah cu kan thei loh an ti i, an cil an chak i a mit an huh i an bengh i, an sertsat i, an nihsawh i, “Vailam ah tah ko” tiah an au i, chiat an serh i, an thah. Israel mipi lawng si loin, kanmah hrimhrim zong nih, kan Khamhtu le kan Bawipa Jesuh cu atu le atu in kan nun ah kan hlawt tawn i, zei kan rel lo i, a min kan chiatter i, kan ke tang ah kan chiah lengmang ko.

Nan ruat tawn cio dek maw? Kan Bawipa Jesuh kha Jerusalem khua i, kha ti sunglawi ngaingai in a va luh ahkhan ai nuam hnga dek maw? Cu ti thangtthatnak a pe cuahmah mi minung hna nih a rauh hlan te ah an hlawt dingkha ai theih tuk ko. Kan Bawipa Jesuh cu kha mi hna he hmunkhat i um tti cu a nuam a ti bal lai loh. A rau lo, Jerusalem ahcun a lut i, zaan hmanh riak lo in, chikhat ah Bethani khua ahcun a kir tthan colh.

Khrih ah ule nau hna, a thar in ruat tthan hna usih tiah kan sawm duhmi hna cu, kan sin i vel ngeihnak he a rak i langhmi Bawipa Jesuh cu nang le kei nih teh zeitindah kan cohlan? Chikhat te lawng lawmhnak le thangtthatnak pe in, caan dang vialte ahcun mah duh salam nung in a hlaw mi kan si sual hna maw? Biakinn le mi hmai lawng ah a thangtthat mi kan si sual maw? Mah pumpak hrang lawng ah a thangtthat mi kan si sual maw?

Atu caan lawng ah siloin, a zungzal in velngeihnak le sunparnak he kan sin ah a rak i langhmi Bawipa Jesuh cu kan thinlung, kan ruahnak, kan sining, kan thazaang dihlak in thangtthat ko hna usih. Amah dawtnak le biatak cu kan nun ah siseh, kan ruahnak ah siseh, kan biachim ah siseh, kan zeiong te ah langhter peng ko hna usih.

Facebook Comments

You Might Also Like

No Comments

Leave a Reply

%d bloggers like this: