Nunnak Changreu

Thihnak lawngte…?

March 27, 2015

Thihnak lawngte, aipeh peng, hmunkip ah! Thihnak thawngpang ka theih paoh ah, thihnak nih a chuah hnawhmi hna inn chungkhar ca khi ka tuak peng tawn, aho fa dah a si hnga, aho u dah a si hnga, aho nupi/pasal dah a si hnga, aho hawikom dah a si hnga, ho te inn pawng ummi dah a si hnga timi hi ka ruat peng.Zeitluk indah a tlun hnawhmi hna chungkhat sahlawh rualchan, hawikom, innpa chakthlang caah a fah khun hnga.

Jesuh Khrih zumtu kan si kan ti thawngin thihnak thlanmual chungin kan luat hlei lai loh. Nikhat khat ahcun zumtu vialte hna nih zungzal nunnak a nuamhnak hi kan tep cio te hna lai, sihmanhsehlaw mah cu hlan ahcun taksa sinak nih a chuahpi mi ngaihchiatnak thlanmual hin cun kan luat hlei lai loh. Kanmah pumpak cio zong thihnak kan tong lai i, kan chungkhar, kan sahlawh rualchan, kan hawikom le kan innpa chakthlang nih ngaihchiatnak thlanmual an tonmi zong kan tonpi hna lai. Um…a awl bak lomi, a faktuk mi ngaihchiatnak a si ko. Khrihfa a simi hna nih thihlo nak kan ton tikah zeitindah kan tei lai?

Pakhatnak ah, ka thi cang lai tiah timh tuah awk a ttha tawn loh! A ruang cu, caan tampi cu , thihnak hi minung nih kan i ruah ning lengin ruahlo piin kan tong tawn. Tuchan news kan zoh tikah, thih lohnak lawng te, van lawng a tla, ramkhat le ramkhat an i doh i, thihlohnak an tong, mino tete sualnak phunphun ruangah maw thihlohnak an tong. Innpa chakthlang, sizung ah thihlohnak lawngte a si ko. Zeibantuk thih lonak kan va ton hmanh ah, ningzak in le keimah sual ruangah a si ti duh hlah, Bible ca nih cun; “A ni hna cu relpiak an si i, A thla hna cu zeizat an si kha nangmah nih na hngalh; Nangmah nih a lonh khawh lomi ramri khan a serpiak” (Job 14:5) a ti. Thihnak le nunnak cu Pathian kut ah a um ko. Pathian lawnglawng nih thihnak hi a timh tuah khawh ee.

Pahnihnak ah, Thihnak hi Pathian nih minung hna nih hin fakpi in tuar te hna seh tiah minung ser hramthok ka ah a rak tinhmi a si hrim lo ee. A ngaingai ti ahcun, Thihnak hi Pathian nih tinhmi chung zongah ai telmi a si loh. Ser hramthok ka in, minung nunnak cu thihnak lam si loin, zungzal nunnak lam lei ah sermi a si ko, sihmanhsehlaw nawl ngaihlo ruangah, mah cu zungzal nunnak lam lei cu a tlau i, zungzal thihnak lam lei tu ah minung cu kar a hlang. Cucaah hi vawlei cung i thihnak kan ton ve zong hi a si. Khrihfa kan si ko zongah, sualnak in a khat cangmi kan pumsa nih khan zungzul nunnak hram kha a phak khawh lo tikah, hi vawlei cungah hin kan pumsa cu kaltak in, Khrih nih pekmi pumsa kha i hrukin Pathian sinah kan phan te lai. Cucaah, hi vawlei cungah thihnak kan ton tikah, kan ngaihchiat awk le kan ttah awk a si ko, sihmanhsehlaw hi vawlei cung thihnak kan ton ni cu, Khrih nih pekmi pumsa thar kan i hruk ni kha a si ve lai. Cu tikah, khi ram ahcun, “Thihnak a um ti lai lo, ngaihchiatnak le ttahnak le fahnak zong a um ti lai lo. Thil hlun vialte cu an lo dih cang” (Biathlam 21:4).

Pathumnak ah, Thihnak kan ton tikah kanmah lawng kan si loh! Hi vawlei cungmi vialte zong nih thihnak an ton i, ngaihchiatnak an ton cio ko. A si ko, thihnak kan ton ning cu ai lo cio men lai loh, sihmanhsehlaw kanmah lawng kan si hrimhrim loh. Kannih zumtu mi hna cu, thihlohnak kan ton tikah, zumtu unau vialte nih an kan umpi, cu lawng hmanh cu siloin, Amah Pathian hrimhrim nih khan a kan umpi.

A donghnak bikah, Thihnak cu ngaichiatnak, ttah ai hramnak, fahnak, lungretheihnak le muihnak thukbikmi chung i kan um lio caan hmanh sisehlaw, Pathian bia nih cun cu a thukbikmi muihnak chung i kan um lio caan zongah, Ceunak Ngeitu nih a kan umpi ko. Mi tampi nih cun, “Zeicahdah mittha mi hna nih hin harsatnak le ngaihchiatnak an ton ve hnga an ti tawn?” Sihmanhsehlaw, keinih ka khuaruah har deuhmi cu, “Zeicahdah hi tluk misual mi hna nih hin tthatnak hi kan ton hnga?” ka ti ve. Kan sualnak cu a duk in duk hmanhsehlaw, kan ca i a pekmi thisen thawng cun, kannih cu mithiang ah cohlan kan si. Pathian nih khuaruahhar in ,muinak kan tonmi chungin tthatnak ah a thlen khawh ko. “Ka cung i tthat lonak tuah awkah khua nan khan, sihmanhsehlaw cu nan khuakhannak cu Pathian nih thil ttha ah a canter. Cu a canter cu zeicahdah a si ti ahcun cu thawngin nihin i a nungmi mi tampi hna hi, an nunnak khamh awkah a rak si” Gen. 50:20

Facebook Comments

You Might Also Like

No Comments

Leave a Reply

%d bloggers like this: