Nunnak Changreu

Nangmah cu kan ngai

March 25, 2015

Pumsa in kan ti hal hmanh ah, kan tha a uai i, kan thluak tiang cawlcang kho lo in a kan tuah. Zeitluk indah tihal a har cu hi vawlei kan chuah ka in kan theih cia pet mi a si ko. Kan pum hrimhrim nih hin ni (3) tiang lawng ti ding lo in a um kho ti asi. Cu ve bantuk in thlarau lei zong ahhin ti hal a um ve. Zumtu tampi nih kan i ruahnak ahcun, Khrih ka ton hnu ahcun, ka ti hal ti lai loh i, Khrih he nifa tin ka kar hlannak ah ka tthawng peng lai i, thazaang ka ngei peng lai tiah kan i ruah tawn. Jesuh nih le Johan 4:14 ah, “sihmanhsehlaw keimah nih ka pekmi ti a dingmi paoh cu zeitikhmanh ah an ti a hal tthan ti lai lo. Ka pekmi ti cu a chungah zungzal nunnak petu cerhtiphut ah a cang lai,” tiah a ti. Cu ti siah, zeicahdah ka nun ahhin thlarau ti a hal tawn ne?

Kan hngakchiat te in Khrihfa a si mi lawng te kan si cio ko hna le Pathian he kan kar hlan nak ah zeitluk indah a har le zeitluk indah kan i chuih, kan i pah, kan tlau, kan lung a dongh tawn cu pheh thu tha lo te ahopaoh nih kan ton mi lawng te an si pet ko. A caan le bang ahcun kan tlau tuk ah, kan thlarau ti hal zong kan thei ti lo i, ti umnak hmun zong ah kan kir tthan kho ti loh.

Hi chiatserh cia mi vawlei kan nun chung ahhin cun thlarau lei ti hal kan tong le mang ko lai. Khamhnak ka co cang, vancung pennak chung ah ka lut cang le ka thlarau ti hal ti lai loh ti awk a ttha loh. Satan le zumlo tu hna nih Pathian an doh duh tikah, an doh mi cu Pathian sunparnak a langhter mi zumtu a fale hna hi kan si tawn. Vawlei nuamhnak phun zakip le harsatnak phun zakip in an kan ttem tawn i, an kan tlau pi i, hlinglak le so lak ah a kan den i, fahnak hma pu in an kan chiah tak tawn.

A caan ahcun kar khat tak hmanh karhlan kan huam lo caan a um tawn. Kanmah nih kan ton mi thlarau tihalnak zong hi Jesuh hrimhrim nih a rak ton ve mi an si, Johan 19:28 ahcun, “Ka ti a hal” a ti. Matthew 26:39 ahcun, “Ka Pa, a si khawh ahcun hi hrai hi ka tthialpiak ko. Sihmanhsehlaw keimah duhmi cu sihlah seh, nangmah duhmi tu si koseh,” a ti. Jesuh nih kan sual a phurhmi a rih tuk tik ah, a celh ve ti lo i, kar khat te kar hlan ding hmanh a celh lo caan kha a um ve. Sihmanhsehlaw, Pathian fapa nih cun, u le nau hna nangmah le keimah nih kan tuah khawh lo mi kha a tuah i, kan caah zaa lak in kar a kan hlan piak. Kan mah thazaang le kan mah thil ti khawh nak in khar hlan ding si ti lo i, Amah nih a kan tuahpiak cang mi cung tu lawng ah kan i hngatchan ding kha kan rian ngan bik si cang.

U le nau hna, hi vawlei na kar hlannak ah thlarau ti hal tong in, hi vawlei thazaang nih dawp in, karhlang kho lo in na um lio caan, Nangmah caah za lak in kar an hlan piak cang tu Jesuh kha i bochan law, amah nih a nung mi cerhtiphut kha an pek lai i, na derthawmnak chung khan a tthawnak in an chuah lai.

“Sazuk nih rial tidai a ngaih bantukin Maw Pathian nangmah cu kan ngai, Maw a nungmi Pathian, nangmah cu tihal in kan hal; zeitik ah dah na umnak ah ka hun khawh lai i kan biak khawh lai?” (Salm 42:1-2)

Facebook Comments

You Might Also Like

No Comments

Leave a Reply

%d bloggers like this: