Nunnak Changreu

Muihnak cu ka Hawikom thabik

March 24, 2015
A tuchan Khrihfa nun ah hna beidong ngai le awlokchong ngai a si mi cu thlarau lei nun dan kan thiam ngai mi le i titer kan thiam ngai mi hi a si tawn. Kan biachiam le kan holh relnak ahcun; (pennak, thangthatnak, zumhawktlak, mah le mah i teinak) ti mi biafang pawl cu kan hman lengmang tawnnak in, kan nunnak ah sullam kan ngeih ter tuk tawn loh. Kan pastor te nih maw, kan hawikom nih maw, “na dam maw, zeidah na lawh?” tiah biahalnak kan ton tik ah, lih kan chim colh i, a dam ngai bantuk le thlarau lei ah a tthawn ngai bantuk in kan nung tawn.

Cu bantuk in zumtu a nungmi kan tamtuk tikah; thlarau lei damnak tlamtling kan hmu kho taktak tawn loh. A zaw mi nih ka zaw lo tiah anmah le anmah an i hlennak in damnak an hmu deuh hlei loh. A zaw mi nih damnak an hmuh cu, si an din i, doctor sin ah an vai piah i, doctor te nih zohkhenhnak le bawmhnak in damnak an hmu tawn.
 
Kan Bible cauk ka duh tuknak pakhat cu lihbia zeihmanh um lo in felfai tein a chung i ai ttial mi hna nunnak kong a kan hngalhter mi hi a si. A hlei in Salm cauk kan rel ahcun, hlaphuah tu hna nih an nunnak ah an ton mi pawl hi zeihmah thuhhainak umlo in tlam lang te in an chim. A caan ahcun hlaphuahtu nih mithli he a tuar mi kong a ttial i, a caan ahcun Pathian tthatnak le um pinak kong ai fian lo mi ah biahalnak a ngeih, a caan acun zumh pah zumh lo pah in a umnak kha a ttial i, a caan ahcun a sualnak le a sining vialte kha ai phuang tawn. .
Lihbia zeihmanh um lo in, thlamlang te in a kan chimh mi nunnak kan rel tikah thazaang tampi kan i lak tawn. Salm fungkhat hnu fungkhat kan rel ahcun, a donghnak tete caang poh ahkhin thazaang peknak kan hmuh khawh deuh tawn. Bianabia ah,
1.     “Bawipa cu miding cu an lam kha a hngalh, sihmanhsehlaw mit’halo cu an lam kha rawk lai” (Salm 1:6)
2.     “Amah chungah aa dormi cu thlawchuakmi an si.” (Salm 2:12)
3.     “Khamhnak cu Bawipa sinin a rami a si; Bawipa nih a mi cu thluachuah pe ko hna seh” (Salm 3:8)
4.     “Hnangam tein ka it lai i kaa hngilh fawn lai, Bawipa, nangmah lawnglawng nih him tein na ka umter” (Salm 4:8)
5.     “Bawipa, nan awl a ngaimi cu thluachuah na pek hna, na zaangfahnak nih phaw bantukin a huhphenh hna.” (Salm 5:12)
6.     “Ka ral cu an sung lai i vansang au in an um lai, lungmit in chikkhatte ah an zam lai” (Salm 6:10)
 
Nangmah te in rel ve te hmanh, thazaang tampi na hmu lai tiah ka zumh. Amah belte Salm 88 nak belte cu, lungrethei van sang aunak in a donghter. “Ka hawikom tha bik hna hmanh nih khan an ka chuahtak; ka ca i a tangmi hawikom cu muihnak lawnglawng kha a si ko” (Salm 88:18). Mah hi Salm cu rel a nuam lo taktak, zeiruang ahdah hi tin a donghter hna, a dang bantuk in a donghte hna lo tiah keimah le keimah kai el len.
 
Nikhat khat cu Salm 88 a ttialtu pa nih a ton bantuk in nan tong kho ve men, a tong mi zong nan um cang kho men, kan ton lo hmanh ah a tongmi pawng ah nikhat khat cu kan um hrimhrim te lai, hi bantuk kan ton ve i, kan ruahchannak vialte a loh pet tik ah, zeitindah kan nun awk a si?
 
Pakhatnak ah, hi bantuk kan ton ve tikah, Salm 88 a ttialtu pa nih Pathian sin ah a thinlung um mi vialte lungawt’awm lo in a hal pet bantuk in, kan nih zong Pathian sin ah hal ko hna uhsih. Amah cu nawlngeitu a si.
 
Pahnihnak ah Jesuh cu muihnak nak in kan hawikom ttha deuh a si. Amah hrimhrim nih harsatnak le muihnak chung i um kha zeidah a lawh ti kha a theih, cu caah Jesuh cu neih ko hna uhsih, Amah cu kan caah ngaihthiam a kan halpiak tu a si.
 
Pathumnak ah thlarau nun hi a thiam in thiam mi le ai titer mi si ti hlah. Thlarau nun hi i titer peng awk a ttha loh, zeihmanh thuhnak le lihbia um lo in Pathian kan thangtthatnak ahmaw, zumtu dang he kan i pehtleihnak ahmaw, hi vawlei cung i kan nunnak ahhin chim le phuan lawng in siloin, a nung hrim i nun pi ko hna uhsih. Hi vawlei muihnak hi kan pah ngam ko lai, zeicahtiah, kan Pa cu zeizong vialte cung ah nawlngeitu a si i, Jesuh cu kan hawittha bik a si.
“Ka hawikom tha bik hna hmanh nih khan an ka chuahtak; ka ca i a tangmi hawikom cu muihnak lawnglawng kha a si ko” (Salm 88:18)
Facebook Comments

You Might Also Like

No Comments

Leave a Reply

%d bloggers like this: