Nunnak Changreu

Thiang Thlarau le Keimah

March 23, 2015
2 Peter 1:5-9
v.5 “Hi ruang hrimhrim ah hin, nan zumhnak i tthatnak chap kha fak piin i zuam u; cun nan tthatnak ah khan hngalhnak i chap u;”
Zumtu cu Pathian nih a sunparnak le tthatnak hrawmh mi kan si. Amah Pathian tthawnnak lila nih Pathian cu upatnak le ttihzah bu-in kan nun awk a si tiah a kan chimh. Hi a kan hrawk kho tu vawlei pumsa duhnak nih hin a hrawh sual hna lai tiah a ngan ngaingaimi le a sung ngaingaimi khamhnak laksawng cu kan luatnak hnga ding caah a kan pek. Hi ruang hrimhrim ahhin, Pathian sin i kan chiah mi zumhnak cu tthatnak tuahkha fak piin zuam a kan fial. Pathian nih a ka khamh cang, Pathian nih luatnak a ka pek cang ti tiang lawng si lo-in, kan mah hrimhrim kha tthatnak tuah ah fak piin zuam a kan fial. Zumtu tampi cu Thiangthlarau lawng kha tuah kan fial tawn le kanmah nih tuah le zuam kan huam tawn loh. Thiangthlarau nih fial mi aw cu kan theih tawn ko nain, kan mah nih tuah kan huam lo tik ah, kan nunnak ah lunglomhnak um kho tak tak tawn lo. Thiangthlarau bia kha kan el lengmang i, a ngeih kan chiat-ter tawn, cu tik ah, a voi van tam tik ahcun Thiangthlarau aw a si le si lo kan thlei dang kho ti loh. Cucaah, Thiangthlarau aw kan theih i tthatnak tuah fial kan si tik ah, kan pumsa hrimhrim in fak pi in kan i zuam a hau.

Cu nan tthatnak ah khan hngalhnak i chap u’ a ti tik ah hin, kan mah lila kha fial kan si tthan. A.W Tozer nih a ti mi cu, “Khua a ruat hua ha lo mi Khrihfa nakin, khua fakpi in a ruat i, khoi ka indah khamhnak ka hmuh hnga ti-ah a kawl mi an ttha deuh” a ti. Khrihfa nih thathut awk a ttha loh. A tthat sawh lawng zong tthat awk a ttha loh. Khuafak pi in kan ruah a hau. Pathian bia kha nifa tin kan rel i, kan rel mi hi zeidah a si ti fakpi in kan ruah peng a hau. Rel sawh sawh lawng in rel awk a ttha loh. Cauk, news papers le articles dang zong tampi in kan rel a hau. Rel tiang lawng si loin, kan rel mi kha fakpi in kan ruah chih a hau, kan ruah tik zong ah Pathian bia kha thukpi in ruatchih buin, kan thinlung mit au in rel a hau. Cu tik ah Thiangthlarau nih a kan bomh lai i hngalhnak kha tampi in kan i chap lai.
 
v. 6 – nan hngalhnak ah khan mah le mah i uk khawhnak i chap u; mah le mah i uk khawhnak ah khan in khawhnak i chap u; in khawhnak ah khan Pathian tihzahnak i chap u;
Cu ti tthatnak le hngalhnak tampi kan ngeih tik ah, mah le mah i uk khawhnak a kan pek. Kan thiltuah mi le vawlei pumsa duhnak kan ton mi ah, Thiangthlarau nih kan hngalhnak cu hmang in a chia le ttha thleiden khawhnak kha awl te in a kan pek. Sihmanhsehlaw hi ka zawn ahhin, kan mah hrimhrim kha cu a chia le ttha thleiden khawhnak kan ngeih cang mi chung cun, fak piin i zuam in mah le mah uk khawh kha fial kan si. Thiangthlarau nih zu, kuak, khaini, mi kong ceih sal hin ka luat ti tiang lawng a ngah lo. Thiangthlarau nih zeitluk in dah kha bantuk thil hna kha an tthat lo a kan theih ter cang, cu chung ahcun kan mah kha fak piin tuah lo i zuam kha a kan fial, cu ti kan i zuam tikah zeibantuk tukforhnak a rat tthan zong ah tei khawhnak a kan pek lai. Cu ti in, mah le mah i uk khawhnak nih cun in tuar khawhnak kha a kan pek. Zeibantuk tukforhnak le ral le hrem innak kan ton zong ah Bawipa Pathian nih a Thiangthlarau tthawnnak in a kan chuah lai timi ruahchannak a kan pek. Cucaah, zeibantuk thil nan ton hmanh ah Thessalonica khrihfa mi hna bantuk in kan zumhnak kha fek tiin i tleih i intuar khawh kha a kan fial. Cu ti in khawhnak chung in Pathian nih luatnak a kan pek tik ah, zeitluk indah kan Pathian kha nawl a ngeih i, a tthawn ti kha a kan hmuhsak, cucaah, Pathian kha ttihzahnak le upatnak a kan pek.
 
v.7 Pathian ttihzahnak ah khan unau bantukin i dawtnak i chap u law unau banntuk in dawtnak ah khan zawnruahnak i chap u.
Pathian kan ttihzah tik ah kan unau hna zong kha Pathian muisam in sermi an si ti a kan hngalh ter i kan dawt khawh hna. Cu ti in unau bantuk in dawtnak thinlung taktak Pathian muisam keng an si tak tak ti kan hngalh tik ah, an caah kan nunnak pek kha kan sian.
 
v. 8 Hi thil hi nan herhmi an si i tam piin nan ngeih hna ahcun Bawipa Jesuh Khrih nan hngalhnak ah khan tthawnnak an pek hna lai i rian tampi an ttuanter khawh hna lai.
Cu ti in, kan zumhnak thawng in tthatnak kan i chap i, kan tthatnak thawng in hngalhnak kan i chap i, kan hngalhnak thawng in mah le mah i uk khawhnak kan i chap i, mah le mah i uk khawhnak thawng in inkhawhnak kan i chap i, inkhawhnak thawng in Pathian ttihzanak kan i chap i, Pathian ttihzahnak thawng in unau bantuk in dawtnak kan i chap i, unau bantuk i dawtnak thawng cun zawn ruahnak kan i chap ahcun;  zungzal nunnak a si mi Bawipa Jesuh Khrih kan hngalhnak ah khan tthawnnak a kan pek lai i, a pennak chung ah khua kan sa lai i, hi a sermi vawlei ah hin nang le kei cu kan Bawipa Jesuh Khrih nih a kan fial mi vawlei ceu ter tu kan si lai.
 
Sihmanhsehlaw hi thil vialte hi in kan i zuam lo i, kan ngaih lo ahcun, lamnaite lawng a hmu kho mi kan si lai i, Pathian sunparnak le Pathian nih kan caah a kan chiah pik mi rosung le laksawng vialte kha a pennak ram chung ah tap kho in kan um sual hnga, Khamh cang mi a luat cang mi fale kan si hna kan i philh sual hnga. Cucaah ka Pathian kan biaknak ahhin kan thinlung ruahnak, thazaang dihlak chuah in daw hna uhsih tiah kan sawm hna.
Facebook Comments

You Might Also Like

No Comments

Leave a Reply

%d bloggers like this: