Nunnak Changreu

Mi Hngah Ka Huam Bak Loh…

March 20, 2015
Zeiruang ahdah mi hngah hi kan huam tawn hnga lo? Mi hngah hi awl bak loh! Bazaar kal i line-up hna a van sau pah ahcun ingpuang tawn. Rianttuan lawi pah maw, sianginn kai lawipah hna i traffic jam i ton sual le bang cu huat a tlai tak tak. Siloah, pumh kal lai i, kan chung le hna an i manh rih lo ahcun kan thin a tawiter tawn i, pumh kal hmanh ah kan i nuam tawn hna loh. Zeiruang ahdah mi hngah nih hin kan thin a kan hanter tawn hnga?


Mizei hmanh nih mi hngah hi a harloh a timi an tlawm lai. A hlei in chiatserh ciami vawlei ah kan nun tik ahhin, thil kan duhlo ning le kan i ruahlo ning in a cang mi a tamtik ah, a harter khun. Lenglei i a cang mi ruangah si loin, chunglei in a cangmi ruangah hin mi hngah hi a harter khun.

Pakhatnak ah, kan hngah mi nih hin zeidah a chuahpi lai timi a phi (result) kan zoh tawn i, san a tlai tuk lomi hna a si ahcun kan hngak huam loh. Kanmah caah tthat hnemnak umtuk lomi cu kan hngak huam tawn loh. A bianabia ah, rawl kan chuan tikah, mah hi cu sau deuh in chuan ah a thaw ti kan theih ko ahcun, saupi hngah zongah kan zei a poi tawn loh, sihmanhsehlaw hi cu ka caah hlawknak a umtuk lem loh, a hnu zongah ka tuah khawh ko ti kan theihmi ahcun kan hngak huam tawn loh.

Pahnihnak ah, mi hngah kan huamlonak nih a langhter mi cu; kanmah le kanmah kan i kham (control) kho loh ti a langhter. Kanmah le kamah i Kham (control) kho u sih law, mi hngah kan hau hnga loh, thil an sining tein anmah kal in an kal ko hnga. Sihmanhsehlaw kanmah nawlngeihnak kan duhtuk tikah, mi hngah kan huam lo i, kanmah tein tthatnak tuah kan i tim i, Nawlngeitu a simi Pathian nawlngeihnak kha kan philh tawn.

Pathumnak ah mi hngah huamlonak nih a langhter mi cu, mah pumpak zawnlawng ai ruatmi kan si kha a kan hngalhter. Hnahnawhnak, harsatnak, buaibainak, tlainak ton hna kha kan duh hna loh. Kanmah khuakhan ning le kan i timh ning in thil cang dih seh ti kan duh tawn. Kanmah le kanmah kan i duhtuk le kan i dawttuk ruangah hin mi hngah hi kan huam kho bak tawn loh. Sihmanhsehlaw chiatserh cia mi vawlei ahhin cun, kanmah khuakhan ning le ruah ningin thil a kal khawh tawn lo caah, kan hngah hau tawn ko.

Kanmah lawng hi hngah hau mi minung kan si loh. Bible ca chung kan zoh ahcun, a rak hngak ve mi lawng te an si ko. Abianabia ah, Abrahman le Sarah cu fapa an ngeihnak ding ah kum 75 an hngah hau, Isreal miphun hna cu Pathian nih a tinhpiak mi hna ram an luhnak ding ah kum 40 an hngah hau, Biakam hlun i prophets hna nih Khamhtu a rak ratnak ding kha an hngah. Tuchan Khrihfa ai timi hna minung vialte nih kan Bawipa Jesuh Khrih a rat tthannak ding kan hngak ve.
U le nau hna, nang le kei zong, mihngahnak nih hin sualnak lei ah tluk termi zumtu silo in, Pathian lei tu ah thazaang thar laknak ah a hmang mi zumtu pakhat cio si ko hna uhsih tiah kan sawm hna.

Hngahnak cu hrial khawhlomi a si. Pathian nih nang le kei zong a zaangfahnak thawng in a kan hngah. Mi kan hngahnak nih kan nun ah rian tampi a rak ttuan i, hlawhtlinnak tampi kan hmu tawn. Hngahnak nih thil ttha a chuahter tawn. Nikhat khat cu hngahnak hi a um ti lai loh. Mi hngahnak chungin lunglawmhnak kawl ko!
Facebook Comments

You Might Also Like

No Comments

Leave a Reply

%d bloggers like this: