Nunnak Changreu

Thawngttha

March 19, 2015
Zumtu tampi nih Pathian thawngttha hi awl zaang tuk in chim le phuan a si tawn tik ah, Pathian vel hi kan thei kho tak tak tawn loh. Sunday School kan fale te te Pathian thawngttha hi zeidah si tiah biahalnak ka hngaih tik hna ah, a ho hmanh nih an ka let kho lo. Nu le pa, pastor te le thawngttha chimtu tampi nih cun “Thawngttha” timi bia cu zarh fatin kan hman ko nain, a sullam tak tak kan hngalh lo le kan ruah lo tikah, kan nunnak ah thlennak kan hmu tawn loh. Thawngttha i a muru taktak theih lo le zumh lo ahcun, Vancung Pennak chung ah ka lut lai ti zong ah, minung zuamnak in a cang hnga. (Toidornak, dawtnak, zumhnak, tthatnak, mah le mah i thei khawhnak, lawmhnak, daihnak, lungsaunak, le zaangfahnak) he nifa ka nung lai kan ti zong ah mah pumpak zuamnak a si hnga i, Farasi pawl he kan i lo hnga. Nifa kan nunnak ah Pathian thawngttha hi kan phuan le kan ruah peng hau mi si. Phungchim thiam pakhat pa nih cun, “Sual voikhat na tuah ah, nangmah le nangmah thawngttha voi hra peng i chim” a ti.

 
Kan Pathian cu vawlei a ser hlan in Dawtnak Pathian a si i, hawikomhnak/pehtlaihnak a ngei mi Pathian zong a si. Van le Vawlei zeizong vialte cu Amah sunparnak caah a ser hna i, Amah muisam lo in minung cu vawlei a sermi zohkhenh tu le Amah sunparnak caah le Amah sunparnak chung ah Amah he hawikomhnak ngei in, Amah ah i lawm ding in ser kan si. Cu lawng cu si lo in, vawlei cung ahhin tefa tampi ngei ding le vawlei kha uk ding in ser kan si. Pathain muisam lo in ser mi kan si kan ti tik ah hin, Pathian muisam lawh cu zei dah asi hnga? Pathian cu a Thiang, a Dingfel, a Tha, a Lungsau, Zumhawk a thlak, Vel a ngei, Dawnak a ngei, etc.. A muisam lo in ser mi kan si ahcun, Pathian nih a ngaih mi sining le ziaza vialte kha minung ah a um pet ve mi a si hnga. Sihmanhsehlaw minung cu sualnak chung ah a tluk tik ah, muinak in a khat i, Pathian muisam cu keng ti lo in, vawlei zong uk ti lo in, vawlei muisam tu kan keng i, vawlei tu nih a kan uk cang. Minung nih Pathian nawl kan ngaih lo tikah, kan Pathian cu lungkuai in, a mitthli he minung a ser kha ai chir tuk (Gen.6). Sihmansehlaw kan ruahnak nih a phak lo mi a Vel thawng in, minung sin ahcun a rak i langh tthan i, Pathian le minung kar ah khan remnak sernak kha a kawl tthan. Minung kan sual kha a ngan tuk tik ah, a sermi minung hna nih Amah sin an phak khawh ttthannak ding ahcun, Amah hrimhrim kha minung sin ah a va ttum i, a nunnak pek in Amah nih Amah sin ah a kal pi tthan hna hau. Cu tikah, zeizong vialte Sertu pa, bawi vialte lakah Bawi pa nih, a sunparnak le a lianhngannak kha kal tak in, toidornak he vawlei ah khan rak ttum in, thih awk a thlak mi misual kan can ah, kan sualnak vialte kha Kalvary vailam ah rai a kan thawi piak.
 
A ngaingai ti ahcun keimah thi ding ka si, Jesuh si lo in. Keimah hremnak tuar ding ka si, Jesuh si lo in. Sihmanhsehlaw keimah dirhmun kha i lak riangmang in keimah can ai ah a Nunnak a pek. Ka nawlbuar ruangah tem innak a tuar. Ka tthatlonak le dinfel lo ruangah mawhchiat le soisel a in cu a si. Ka sualnak ruangah hma a in cu a si. Hremnak a in mi nih daihnak a ka pek i, an tuknak vual in damnak ka hmu. A ngaihchiatnak cu kai lomhnak ah a cang i, a thihnak cu ka nunnak a si!
 
Cu Pathian nih kan caah a kan tuahpiak mi a zum mi poh nih cun, nunnak thar kha kan hmuh i, Amah muisam lo chin lengmang in Khrih nih a kan ser tthan. Ser hram thok ahcun minung kha vawlei uktu nawlngaihnak lawng pek a si nain, Ser thar mi Khrih ahcun, vawlei lawng si lo in, vancung ram zong ah ro cotu kan si cang. Ser thar mi Khrih ahcun (thian hlimnak, dawtnak, lawmhnak, daihnak, zumhnak, tthatnak, lungsaunak, toidornak, mah le mah i tei khawhnak) te hna hi taksa i zuamnak in si ti lo in, Amah sining le ziaza kan chung i a um mi kha nikhat hnu ni khat in a langh ter i, vawlei mi hna nih an hmuh tik ah, Amah sunparnak kha an hmuh i, Pathian dawtnak theih duh ah an ti a hal i, an rawl a ttam.
 
Pathian nih a kan dawtnak vel hi, a sawh sawh le zarhpi ni caan lawng ah a ruat mi zumtu si lo in, nifa kan nunnak ah a ruat i, ai nun pi i, lam a kan hruaitu  ah a chia i, a sunh lawih mi zumtu pakhat cio si ko hna uhsih tiah kan sawm hna.
Facebook Comments

You Might Also Like

No Comments

Leave a Reply

%d bloggers like this: