Nunnak Changreu

Kan Nun ai thlen tawn lonak a ruang cu…

March 18, 2015
Pathian thawngttha hi a theih lawng hei thei uhsih law kan nunnak ah thlennak um hlah sehlaw, zeidah san tlai hnga? Zumtu tampi cu thawngttha hi zeidah a si ti cu kan hngal ngai, a chim zong kan thiam ngai tawn nain, kan nun ah thawngttha nih a chuah pi mi theitlai kan hmu tawn loh. “Khrihfa na si maw?” ti biahalnak kan ton tik ahcun, “ka si ko” kan ti ve ko nain, kan nun dan cu zumlo tu hna nun dan nak in duk thla lo deuh tawn. Zei ruang ahdah kan theih mi thawngttha nih hin kan nun hi a thlen tawn hna lo? Sual muihnak chung ahhin kan tan peng rih ko hna hnga?
Pakhatnak a ruang cu: “Aho dah ka si” timi hi kan i hngalh tawn lo caah a si. Zeitluk indah a sual mi kan si ti hi cu i hngal uhsihlaw, kan caah zeitluk indah Thawngttha hi sullam a ngaih hi kan i fiang hnga. Kan Pathian hmai ah khupbil in lunglawmhnak chimh lo in kan um kho hnga loh. A dang sual kan tuah tthan hmanh ah, ngaihthiam hal lo in kan um kho hnga loh, zeicahtiah zeitluk indah a vel le a dawtnak a hngan kha kan i fiang tuk hna. Nifa tin kan nunnak ah cu tluk in a sunglawi mi Thawngttha cu ruat lo in kan um kho hnga loh. Chun zaan in a dawtnak Thawngttha cu kan ruat hna i, a cung i lunglomhnak biachim cu ngol ti kan thei hna loh.
 
Pahnihnak a ruang cu: “Aho dah ka si cang” timi kan i hngalh tthiam tthiam lo caah a si. Thawngttha kan ti tik ah, “Pathian nih minung hi a muisam lo in sermi kan si i, minung cu nawlngaih lo ruang ah Pathian he an i pehtlaihnak le sermi cung i nawlngaihnak pek an si nak kha a lo i, zungzal in Pathian he hlat an si cang, sihmanhsehlaw Pathian nih a dawtnak vel in a nunnak kha Kalvary vailam cung ah pek in minung he remnak kha a ser” ti  tiang lawng si lo in, cu Thawngttha nih cun, Pathian nih fa ah a ka cohlan i, Pathian roco tu ka si cang ti kan i theih hrim hrim hi a hau. Pathian fa ka si cang ti ai thei mi nih cun, Pathian sin ah lunglomhnak chim kha ngol ti an thei ti hna loh. Pathian dawtnak Thawngttha kha an nunnak ah ruat lo in an um kho hnga lo i, cu thluk in a sunglawi mi Thawngkha kha midang sin ah chim lo in an um kho hnga loh.
 
Zumtu tampi cu Thawngttha nih a kan pek mi nunnak thar kong hi fakpi in kan ruah tawn lo caah, kan nunnak ah thlen nak kan hmu kho tawn loh. Nifa tin kan nunnak ah hi Thawngttha hi kan ruat loh i, kan nun ah Thiangthlarau thei tlai kan hmu kho tawn loh. Cu tik ah, minung tampi nih Vancung pennak chung ah mah minung thil ti khawhnak in luh kan i tim tawn i, kan lut ve ko rua kan ti cuahmah lio caan ah, kan mah le kan mah kan i hleng i, kan nun a ro car tawn. Cu caah u le nau hna, Paul nih Khirh le a vailam tahnak kong lawng a chim bantuk in, kan nunnak ahhin Khrih le a vailam tahnak lawng hi chim in ruat ve ko hna uhsih, cu nih cun kan nun hi a ling ta let in a thlen ko lai.
 
Hi tluk in a sunglawi mi thawngttha (Khrih le a vailam tahnak kong) hi pumpak cio kan nunnak lawng ah a chim le a phung pengmi si lo in, kan fale te hrim hrim ni chiar te a chim mi Zumtu ttha si hna uhsih law, an cal ah siseh, an ban ah siseh, inn kaa tlang ah siseh a ttial i, a chim mi zumtu pakhat cio si ko hna uhsih tiah kan sawm hna. Hngakchia hrang ah theih a har tuk ti hna hlah uhsih, thinlung tak in chim in phung in rel ko hna uhsih, thei a tlai ter tu cu Pathian lawng lawng a si ko lai.
Pumpak pakhat cio kan nun ah Pathian Thawngttha nih thuk deuh deuh in kan nun ah a hram bunh ko seh!
“Ka u le ka nau hna, nan sin i Pathian biathli chim awk i ka rat ah khan, biathluan sausau le cathiam sang pawl nih an hmanmi bia kha ka hmang hna lo. Zeicahtiah nan sin i ka um lioah khan Jesuh Khrih le vailam i an thahnak kong dah ti lo cu a dang zeihmanh ruah le khah kaa timhmi a um lo.” (1 Korin 2:1-2)

 

 

Facebook Comments

You Might Also Like

No Comments

Leave a Reply

%d bloggers like this: