Nunnak Changreu

Khua hmuhter tawn lo tu sual…

March 17, 2015
Zumtu ni fa kan kar hlannak ah atu le atu in sual nih kan mit a kan cawt ter cemnak pahnih a um. Pakhatnak ah, hi vawlei cung ah kanmah le kanmah hi a biapi cem le a sunglawi cem hmuh in a kan hmuh ter. Kanmah duhmi, herhmi, le mah ca tthatnak lawng kan ruat tawn. Thlawchuah tampi kan hmuhmi le kan comi nak in kan herhmi le duhmi pakhat te ah kan lung a fak deuh tawn. Mah zawn ruahnak le duh hakkauhnak thinlung pi he kanmah nih kan ngeih mi nak in mi thil kan mit a thi deuh dawn. Kan nun ah lungsi nak kan ngei lo i hnahchuahnak thinlung he kan khat ko. Keimah timi le mah ca tthatnak lawng a kan ruah ter.

 
Pahnihnak ah, sual nih cunglei lawnglawng in hmuh khawh mi thil hna kha vawlei ahhin a kan kawl ter. Sualnak nih mit hmuh khawh mi thil hna zoh in nunnak, ruahchannak, daihnak, hnangamnak, lunglawmhnak, sinak, sullam le tinhmi hna a kan kawl ter tawn, sihmanhsehlaw hi thil vialte hi hmuhkhawh an si taktak loh. Sermi thil hna hi kan thinlung diriamh tertu ding ah ser an rak si hrimhrim loh, ser an rak si cu Sertu pa, minung thinlung le sermi thil vialte diriamhnak a pe kho tu pa a um timi lam hmuh sak tu men lawng an rak si. Cucu sual nih kan mit a kan cawnter tawn i, minung tampi cu zing ka kan tho i, Sersiam tu Pa sin ah diriamhnak kawl lo in, sermi thil tu ahhin diriamnak le khamhnak hna kan kawl tawn.
 
Salm cattial tu Asaf nih cun, “Vancung ah khin nangmah hlei in ahodah ka ngeih? Nangmah kan ngeih cang caah vawlei ah hin zeidah ka herhmi a um? Ka pum le ka ruahnak cu zorchuk hna hmanh sehlaw Pathian kha ka thazang a si; amah lawnglawng kha ka herhmi cu a si ko” a ti. Zumtu hna sual nih kan mit a kan cawt ter tawn cu, diriamhnak kan ngeih tawn lo ruang ah a si ko. Kan nunnak diriamhnak a pe kho tu taktak cu Pathian lawnglawng a si ti kan theih ko nain, caan tampi diriamhnak kan ngeih taktak dawn lo cu, Sertu Pa kha zoh lo in sermi thil tu in nunnak kan kawl tawn caah a si ko. Kan thinlung Amah sin lawnglawng ah ai dinh lawng ah, dinhnak taktak kan hmu lai.
 
Pathian vel nih zumtu hna nun ah a chuah pi mi thlarau theitlai ai dawh tuk mi pakhat cu a Bia rel deuhdeuh, a hla kan sak deuhdeuh, a sin thla kan cam deuhdeuh, kan thinlung ah lawmhnak le hnangamnak a um deuhdeuh mi hi a si. Nang le kei cu, sualnak nih mit cawt ter mi ‘keimah’ timi le ser mi thil ah nunnak a kawl mi si lo in, Sertu Pa sin lawnglawng ah a thinlung mit a au i, a nunnak a chia mi pakhat cio si ko hna uhsih tiah kan sawm hna.
 
A caan na ngeih ahcun 1 Timothy 6:6-10 kha rak rel tthan ve hmanh… 🙂 
Facebook Comments

You Might Also Like

No Comments

Leave a Reply

%d bloggers like this: