Nunnak Changreu

Chunmang manh pa nan ka ti ko men lai

March 14, 2015
Saram; uico, chizawh, caw le rang hna nih cun, chunmang an manh kho loh, sihmanhsehlaw Pathian muisam lo in sermi minung kan nih cu tinhmi kan ngei, ruahchannak kan ngei i, chunmang a phunphun he kan nung. Kan hngakchiat lio te ah nu le pa le pi le pu nih, na upat tik ah zeidah na tuah lai ti hal a rak si tawn. A cheukhat cu kan hngakchiat lio te in kan chunmang manh mi kan si taktak hna i, a cheukhat cu kan chunmang manh mi he ralchan bak kan si. Kan hngakchiat lio lawng ah chunmang hi kan manh lo i, nifatin kan nunnak hrimhrim ahhin chunmang he kan nung.

 
A cheukhat cu rumnak lei chunmang kan manh i, a cheukhat cu inn chungkhar i tthithruainak ah umnak hmun le ei paw cawmnak te kan ngaih ah a za ko kan ti i kan manh. A cheukhat cu hmailei kan nupi kan pasal kong ah chunmang kan manh i, a cheukhat cu fale hrangah chunmang ngan pi kan manh piak tawn hna. A cheukhat cu kan hawinu kan hawipa nun kan zoh tik hna ah, kan hngar hna i, anmah bantuk in si kho uhsih law tiah chunmang kan manh. A cheukhat cu kan khrihfabu nih Biakinn nganpi ngei uhsih tiah chunmang kan manh. A cheukhat cu hmailei hruaitu lianngan si ning tiah chunmang kan hmanh. A phunphun in mi zakip nih chunmang kan manh cio ko. Nifatin chunmang kan manh mi nih nih, kan nundan le kan cawlcangh dan hi a chimrel ngaingai caah, zeitindah chunmang kan manh cio ti hi ttha te in ruah hau mi si.
 
Pakhatnak ah, chunmang manh hi cu minung he hmunkhat ah a kal tti mi an si. Innzuat sat’il hna nih chunmang an ngei ve lo i, cawm kengtu an ngeih poh ahcun an hna a ngam ko. Sihmanhsehlaw minung, nang lei kei cu, thlarua le thinlung he a nung mi kan si tikah, duhmi le ruahnak phunphun kan ngei tawn. Chunmang kan manh tik ah, kan manh mi a kan hmuh co lo mi a tam ngai tawn, sihmanhsehlaw u le nau hna, kei nih kan forh duhmi hna cu, na chunmang manh mi nih zeitindah Pathian sunparnak a langhter lai le midang hrangah tthatnak a si lai ti kha ruat chih peng tiah kan sawm.
 
Pahnihnak ah, minung tampi hi chunmang kan manh mi nih a kan ttemttawn tawn. Chunmang manh cu sual  a si lo nain, kan chunmang manh mi lawngte kan ruah tik ah, chunmang manh khawhnak a kan petu Pathian kha kan philh tawn i, ttemttawn tu ah a cang tawn. Kan chunmang manh mi a tthat lo tikah, kanmah pumpak nunnak lawng si ti lo in, kan pawngkam kan hawinu kan hawipa nunnak hrimhrim kha a hrawh tawn. Chunmang t’ha lo nih hin, mah pumpak zawn lawng ai ruat tawn i, inn chungkhar, hawi le kom, sahlawh rualchan vialte a t’hio tawn hna.
 
Pathumnak ah, kan chunmang cu a lo te lai. kan chunmang kan van ti bak khin, mah pumpak a sawh colh tawn. Pathian riantuan tu kan si ah, kan chunmang cu kan khua kan zaatlang vialte nih Pathian an theih khawhnak hnga a rian kan tuan zong ah, Pathian sunparnak nak in mah sunparnak kan kawl deuh caan zong a ra kho. Kan chunmang a loh tikah, kan khuaruah a har awk a si loh, zeicahtiah Pathian nih a dawtnak he kan chunmang nih tem’t’awn i thah mi minung si lo in, kan chunmang tu kha a loh ter tawn tu a si. Chiatserh cia mi vawlei ah kan nun tikah hin, kan mah nih kan duhning in thil hi a kal tawn loh. Pathian sunparnak le dinfelnak caah chunmang ka va manh ko zongah, kan mah duhning in thil a kal tawn loh. Kan nih cu nawlngeitu kan si loh, Pathian lawnglawng hi zeizong vialte cungah Nawlngeitu a si. Na chunmang kha fek tuk in nai tleih sual ahcun, na lung tlinter tu cu a si bal lai loh.
 
Na chunmang nih an kal tak i, na manh ning in thil a can lo tikah, chunmang manh khawhnak an petu Pathian tu kha fuh tthan law, na hrang ah kha nak mangttha deuh an pek ko lai.
Facebook Comments

You Might Also Like

No Comments

Leave a Reply

%d bloggers like this: