Nunnak Changreu

Philh Hmangmi Lawngte Kan Si Pet Ko…

March 13, 2015
Ka palh lo ahcun, thil philh hmang mi lawng te kan si cio ko. A cheukhat cu midang nak in tam deuh philh hmang mi kan um i, a cheukhat cu tlawm deuh philh hmang mi an um. Nifa tin te hi philh mi kan ngei peng ko. Nifa tin kan nunnak ah kanmah le kanmah kan i zohkhenhnak ahmaw, midang he kan i pehtleihnak ahmaw, Pathian he kan ipehtleihnak ahmaw, philhnak lawng te in kan khat ko. Philh kan hman tuk ruang ahhin kan nunnak ah buaibainak a chuah tawn zong hi a sii. Cu hmanh ahcun, a poituknak pakhat cu philh kan hman mi hi mi tampi cu kan i hngal tawn loh.
 
Nifa tin kan nunnak i thil dangdang kan philh mi hna khi cu hei um rih ko seh, kan Pathian dawtnak le zaangfahnak le thluachuahnak kan philh tawn lengmang mi hi a poituk mi asi. Kan chunmang hmanh i kan rak cuanh ngam ballo mi ram ah kan phak tikah, an ram sining le cawlcangh ning in kan nun ve tik ah, manhlo ngai in nifa tin khua kan sa i kan paw cawmnak caah kan lung re a thei. Mah le pumpak ca cio ah kan nung hna i, Pathian nih zeitluk in thluachuah a kan pek kha kan philh tawn. Kan phu kan tawk lo pi in kan comi Pathian thlawchuahnak hi chikhat te ah thil dang kan philh tawn bantuk in kan philh colh tawn.
 
Zingchiar te hi, Pathian zaangfahnak le thluachuahnak nih hin a kan don peng ko nain, kan thei kho hrim tawn lo i, kanmah pumpak khua saknak le mah zawnruahnak lawng kan ruah tik ah kan philh peng tawn. Zaan kan ih lai zongah, zeitluk indah Pathian thlawchuahnak le zaangfahnak nih kan nun a kan zoh le kan lam a ka hruai ti kha kan philh tawn. Pathian hmaika ah caan tha la i, a dawtnak le a zaangfahnak kong hmanh kan ruat tawn loh. Pathian dawtnak le zaangfahnak hi a tu le atu kan philh peng tik ah, kan Khrihfa nun nikhat hnu nikhat in a zorter tawn.
 
Pathian thlawchuahnak le dawtnak kan theih ttthan tikah, kanmah te in zeihmanh a tuah kho lo mi le a si kho lo mi kan si kha a kan hngalhter tthan tawn. A zaangfahnak kan theih tthan tikah, lunglawmhnak, toidornak le thinfualnak a kan pek. A khamhnak kan theih theih tthan tikah, mah pumpak zawnruahnak kha a kan hlawt ter ii, amah thangtthat duhnak thinlung kha a kan pek tthan. Sihmanhsehlaw Pathian thlawchuahnak le velngeihnak kan philh tikah, kanmah tein thil tuah kho mi le a nung kho mi ah kan i ruah tawn. Pathian thlawchuahnak le velngeihnak kan philh tikah, Pathian kha sunparnak pe ti lo in kanmah le kanmah min tthat kan i pe. Pathian thlawchuahnak le velngeihnak kan philh tikah, kanmah le kanmah kha a dingfelmi le thlawchuahnak kan co kha kan i tlak ruang ah kan co timi si ti lungthin put a kan ngeihter tawn.
 
Cucaah, U le nau hna, nang le kei cu philh a hmang tuk mi minung kan si caah, Pathian zaangfahnak, dawtnak, velngeihnak, thlawchuahnak hi ruat tthan hna uhsih law a sinah lunglawmhnak chimtthan hna uhsih tiah kan sawm hna. A thlawchuahnak le a vel kan hngalht’hannak nih Pathian kha a kan thangt’hat ter lai i, toidornak thinlung a kan pek i, midang pekchanh duhnak le bawmh duh ve nak kha a kan pek lai. Pathian sin in kan hmuh mi thil hna cu kan i tlak ruangah kan co mi thil pakhat hmanh an um loh.
Facebook Comments

You Might Also Like

No Comments

Leave a Reply

%d bloggers like this: