Nunnak Changreu

Nikhat khat cu…

March 12, 2015
“Zeicahdah kan ngeih a chiat? Zeicahdah ka lungre a theih? Pathian cu kaa bochan t’han lai i ka Khamhtu le ka Pathian cu ka thangt’hat t’han lai.” (Salm 42:11)
 
Caan tampi cu lungretheihnak le ngeihchiatnak nih a kan tlun hnawh tikah, khua zaza a kan ruah ter tawn. Kan ngeihchiatnak le lungretheihnak chungin kanmah tein kan i hnem tawn le, “nikhat khat cu…” timi kong kan ruat tawn;

Nikhat khat cu rian ttha ka ngah te lai le tangka tampi ka ngei te lai.

Nikhat khat cu kan inn chungkhar nih kan herh mi inn le lo kan cawk khawh te lai.

Nikhat khat cu ka leiba vialte kai cham khawh pet te lai le zeihmanh harsatnak ka ngei ti lai loh.
Nikhat khat cu ka duh mi Khrihfabu ah kai pum te lai.
Nikhat khat cu ka duhtuk mi nu te he kan i um te lai.
Nikhat khat cu bochan awktlak ka si te lai.
Nikhat khat cu ka rum te lai.
Nikhat khat cu BMW 335i kai mongh te lai.
Nikhat khat cu “nikhat khat cu..” kan ti i thil phunkip kan ruat, sihmanhsehlaw Nikhat khat cu kan ti peng mi nih hin, ngeih kan duhmi thil pawl a langhter, sihmanhsehlaw kan ngeih hrimhrim hna lai tinak ah zeihmanh amahkhan a um loh. Caan tampi cu, pakhat le pakhat thazaang kan i pek tawn ah, na lungretheih na ngeihchiat caan ah Pathian sin ah thlacam, cun a thangt’hatnak hla kha sa law thazaang thar na ngah lai kan ti tawn, sihmanhsehlaw a caan ahcun, Pathian dawtnak kan ruah, a thangt’hatnak hla kan sa, a sin ah thla kan cam ko zongah, kan lungretheihnak le ngeichiatnak nih a kan t’emtawn peng t’hiam rih tawn. Kan ti hal a riam kho tawn loh.David hrimhrim zong nih a rak tuar, Pathian thangt’hatnak hla a sa, a sin ah thla a cam ko, Pathian dawtnak kong a ruat ko nain, David nih Pathian cu, “zeicahdah na ka philh? Ka ral nih an ka hremnak hi zeicahdah ka in zungzal ko lai?” tiin a au.
 
U le nau hna, nang le kei zong muihnak horkuang chung i lungretheihnak le ngeihchiatnak he kan um lio caan ah thazaang a thar in la tthan hna uhsih tiah kan sawm mi hna cu; Pakhatnak ah, Pathian nih David nih a tuarmi harsatnak le ngeihchiatnak chungin zeirel loin a kal tak bal lo bantukin, nang le kei kan nun zongah Pathian nih a kan zoh sawh lai loh, a kan bawmh ko lai, cucaah, zumhnak he kar hlang peng ko hna uhsih tiah kan sawm hna. Pahnihnak ah, kan Bawipa Jesuh Khrih hrimhrim kha, nihsawhnak le ngeichiatnak le lungretheihnak le a Pa hrimhrim nih a rak kal tak caan muihnak horkuang thukbik chung i a um lio caan kha a um, sihmanhsehlaw Pathian nih kha vialte chung khan a chuah i cunglei a sannak bik hmun ahkhin sunparnak a pek.
 
Nang lei kei zong, tlangbawi ngan kan ngei, kan lungretheih le ngeihchiatnak chungin a kan chuah tu ding tlangbawi kan ngeih, amah cu zumh awk a tlak i bochan awk a tlak, mit hmuh in siloin zumhnak he Khrih lei ah a panh mi si peng ko hna uhsih tiah kan sawm hna. Nikhat khat cu “Nikhat khat” ti chim hi kan ngol caan a um te lai. Pathian vel thawngin nikhat khat i kan ngeih hrimhrim te dingmi cu harsatnak le lungretheihnak um ti lonak hmun, duh hakkauhnak um ti lonak hmun, le mitthli tlak um ti lonak hmun ah diriam tein zungzal khua kan sa te lai. Khi caan kan phak hlan tiang nifa te a vel in kar hlang ko hna uhsih.
Facebook Comments

You Might Also Like

No Comments

Leave a Reply

%d bloggers like this: