Nunnak Changreu

Zeiruangah dah?

March 10, 2015

Zeiruangah dah tamdeuh ngeih kan duh hnga?

Zeiruangah dah tlawmdeuh le harsatnak tong mi si kan cohlan khawh tawn hnga lo?

Zeiruangah dah a ngandeuhmi le a tthadeuh mi khi kan mit thit khun hnga?

Zeiruangah dah lungsinak le diriamhnak ngeih hi a har tuk hnga?

Zeiruangah dah kai za ko kan ti khawh tawn hnga lo?

Riantthadeuh ngeih duh zong si men lai, boss te tthadeuh duh ngeih zong si men lai, sa thawdeuh ei duh zong si men lai, nungak dawhdeuh ngeih duh zong si men lai, mawtaw tthadeuh ngeih duh zong si men lai, inn le lo tthadeuh ngeih duh zong si men lai, khua dawhdawh ah khual tlawn duhdeuh zong si men lai, coffee thawdeuh din duh zong si men lai; hi vialte thil duhnak nihhin thlarua lei nun kha a dawp i, mah tein diriamhnak kha a kawl ter tawn. Duh a tling kho hrimhrim loh, di zong a riam kho hrimhrim loh. Lunglawmhnak he thla kan cam kan ti tawn ko nain, kan van kan i cau i, cung lei kan zoh tikah; a ngandeuh le a tthadeuh le diriamhnak deuh lawng te kan kawl. Lungtlinlonak/lungsaklonak kan ngeih tik ah, kan mah tein tlamtlinh kan i zuam i, pumpak diriamhnak kan kawl tawn. Sihmanhsehlaw mah cu kan kawl mi le kan tuahmi cung ahcun kan diriam taktak tawn lo i, thuk deuh deuh in diriamhnak kan kawl tthan tawn.

Cu ti sicun, zeitindah mah te diriamhnak kawlnak chung hin kan luat khawh lai? Kan lung kan i tthumh i, misual kan si kha kan cohlan i, kan nunnak ahhin lenglei thil cang mi puh loin kan nunnak hrimhrim ahhin tthatnak pakhat hmanh kan ngeih lo kha kan cohlan i, Pathian nih kan harsatnak le lungretheihnak chung in chuah ding ah a Fapa Jesuh a rak thlah kha kan cohlan ahcun, kanmah te diriamh kawlnak kha kan ngol lai. Zeicatiah cun, kan herh taktak mi le ka duh taktak mi cu Fapa Jesuh Khrih thawng in Pathian ttang chung i nun kha a si. Kanmah tein kan kawl i kan hmuh khawh mi a si lo. Augustine nih cun, “Kan lungthin hi Nangmah ah ai dinh hlan chung cu, ai din lo ee a ti”. Phundang in cun Bawipa lawnglawng ahhin dinhnak/diriamhnak a um ee a ti. Pathian nih a vel thawng in, sual cincik in a kan luatter. A vel thawngin, pumsa duhnak nih a kan lem i, mah pumpak diriamhnak kawlnak chung in a kan luat ter. A vel thawngin, keimah timi thinlung put kha a lak i, Khrih cu kan nunnak ah Bawi a si ti kha a kan hngalh ter. Cu nih cun, a ke hram ah kun in amah thangtthat duhnak thinlung thar kha a kan pek.

Mah pumpak diriamh kawlnak chung in kan luatnak cu Khrih thisen in tlanh cia mi fa kan si ti i theihnak lawng in a za lo i, Amah Khrih hrimhrim he khan pehtlaihnak kan ngeih i, Amah thangtthatnak lawng nih kan lung hi diriamhnak taktak a kan pek. Kan herh mi zeizong te hi Khrih ah a tling pet!

“Zeicahtiah zeizong vialte hi amah sin in le amah thawngin le amah caah sermi an si dih. Pathian cungah sunparnak cu zungzal in um ko seh! Amen” Rom 11:36

Facebook Comments

You Might Also Like

No Comments

Leave a Reply

%d bloggers like this: