Laimi Caah, Open Letters

American Chunmang le Pathian Caah Chunmang.

February 6, 2014

[mirang ca in rel a duhmi caah, hi ka hin click uh
http://dosanaa.wordpress.com/2014/02/06/american-dream-inside-the-kingdom-dream/ ]

Kan dihlak in mang kan ngei cio.  A tthami a si zongah a chiami a si zongah saduhthah timi cu saduhthah a si ko.  Mang timi zaanmang le chunmang tiin phun hnih in a um i atu ka chim dingmi kong hi chunmang kong deuh a si lai.  Chunmang cu kan theih dih cang bantuk in tinhmi a si loah ruahchan bantuk khi a si.

Atu kum 2014 February ni 2 hi U.S ka umnak kum 10 a tlinnak a si i chunmang nganpi he a rak ra vemi ka si.  Ka chunmang cu a fawinak in chim ahcun, thil lianngan tuah khawh, a hlawh a tling mi pa pakhat si ve khi a si ko.   Ka chunmang cu American chunmang ( American dream) he aa khat tiah ka ruah a ruang cu zeizong vialte hi a si kho lomi a um lo tiah ka ruah i zuamnak ka ngeih ahcun zeipaoh ka si kho. “Success le Wealth” Ka ngeih lo ahcun  U.S ka ratmi i pakpalawng lawngte a si lai tiah ka ruah.  High School  ka kai lio i capar ka rak ttialmi cu a hlawh a tling taktakmi si ka duh tahchunhnak ah doctor a ziah tiah ahcun Kawlram ahcun kei ka sining in cun a si kho lomi thil a si.  Chunmang ttha lo a si ka ti kho lo nain a baumi te a um.  A baumi pi a um.  Chunmang a certu, chunmang a siamtu Pathian a bau.  Zeitin dah kei ka lung a rak fiang timi tlawmpal a tang ah ka van chim lai.

Kan chunmang vialte hi a hman lomi lawngte an si! ” American dream” kan timi hi a hman lomi a si, a ruang cu ttha tein in ser a rak si cang komi ( kokek thil) pawl kha kanmah nih kan duh ning paoh in kan tuah hna.  Tuanbia kong tampi cu ka thei lo nain research ka tuah i ka hmuhmi cu “American dream” timi biafang hi James Adam nih American Epic timi cauk a rak thawkmi a si.  “American Dream”  a ti tikah thilri kong lawngah a si lo. Nain, thil pakhat a ummi cu, biakhamhmi a rak si lo!  “American dream”  kan timi hi caan ai thlen bantuk in ai thleng lengmang ve i a tu ahcun “rumnak” lei deuh khi a hoih cang i a ttha lo ngaimi a si.  Mah ti khan zapi nih cun kan ruah ning a si i nai hrawng U.S sining kan zoh tikah kan rak i palh ngaingai ti a lang.  Ram aa hrawk chin lengmang, leiba in a khat, a rammi rian ngei lo le ei awk ei loin a ummi kan tam.  Atu cu ruah tthan caan a cu cang. “American dream” kan timi hi ZALONNAK tiah kan leh deuh ding a si.  Kan duhmi paoh kan tuah awk a si, si kan duhmi paoh kan si awk a si– mah ti khan “American dream” kan timi cu kan hmuh deuh awk a si tiah ka ruah.  Mah saduhthahnak nih a chuahpi dingmi cu Pathian lawng nih a theih.

Sicun zeiruangah dah American chunmang (American dream) hi Pathian chunmang (Kingdom dream) chungah kan chiah awk a si? Zeitin dah bible chungah Pathian pennak kong hi ai ttial? Hi ti hin a si–Pathian pennak, Pathian chunmang  timi hi hmunhma a si lo. Pathian pennak timi cu mit in hmuh khawh le tongh khawh a si lo.  Thlarau kan chung ah a um I ruahter khawhnak le tuanter khawhnak ngeihmi (influence) le thlennak (transformation) a tuah mi khi Pathian ram/pennak timi hi a si cu.

Nain zeitin dah “American dream” hi kan tuah? Thil pakhat tuah kan duh tikah Pathian kha pung-te-ni (equation) ah kan hman tawn i a phi kan chuah kho te ko lai tiah heh tiah number pawl tu pung-te-ni (equation) ahcun kan test tawn.  Pathian duhnak tuah kha i zuam loin Pathian tu nih khan kan duhnak kha rak kan tuahpiak hmasa seh ti kan duh tawn. Hmurka in cun kan chim lo nain, kan nunzia in kan langhter. American chunmang (American dream) hi Pathian chunmang (Kingdom dream) chung ah kan chiah lomi hi a ttha lo ngaingai. A donghnak ahcun luatlatnak tam tuk kan ngeih raungah kan duhmi paoh kan tuah i Babel innsang pi a sami kha kan lo.  Zeitin hme kan um? Pathian caah nunnak kong kan chim zungzal ko nain kan chung lei taktak cun zeitin dah kan rum khawh lai, zeitin dah mawttaw tthattha kan i mawngh lai ti lawngte kan ruat.  American chunmang na manh ve in ti ning law na duh bak lai lo.  “Thil ttha kan duhmi hi a ttha lo tinak a si lo a ziah tiah cun Pathian nih thluachuah a kan pek tikah thil ttha in pei a kan pek cuh, thluachuah cu kan duh cio”. Natein ” Pathian nih thluachuah a ka pekmi i a za ko i ka nunnak hi a ttha tuk va si hlah hmanh sehlaw kaa nungsak ko” a ti khomi kan si ahcun, Khrihfa lungput a ngeimi na si tiah ka ruah.

Pathian chunmang le a tu a hman lomi American mang kan timi aa dannak tlawmpal ka van chim lai.

Pathian chunmang– Khrih thi hlei in na ngeihmi dang zeihmah a um lo.
American chunmang: Nangmah nih thil ttha na ngah khawhnak hna midang thi na chuahter a hau/ na hnursuan han a hau.

Pathian chunmang: Pathian mit ahcun na ttha ko- Na si khawh chung tu in i zuam. ( Col 3:23)
American chunmang: Na hlawhtlin lo ahcun a za tawk in na ttha lo.  Na hlawhtling lo a ziah tiah cun a za tawk in nai zuam lo! Man ngei lo na si.

Pathian chunmang:  Nangmah naa dawt bantuk in na innpa va daw hna/ na biang ah an in bengh ahcun, khat te lai chit tthan hna. (Mark 12:31)
American chunmang: Na innpa daw tuk hna hlah a ziah tiah cun a miak an in ttin lai/ an in bengh ahcun beng ve hna.

Pathian chunmang: Pathian a pakhatnak ah chia law, a dang cu an pek ko lai. (Matt 6:33)
American chunmang:  Thil dang kawl hmasa law, Pathian cu a hnu ah (leftover) kha va pe.

Pathian chunmang: Vawlei hi nangmah inn a si lo . (Phil 3:20)
American chunmang: Americanmi na si i na thil a simi paoh nangmah ta an si.

Pathian chunmang: Pathian chunmang timi cu Pathian he pehtlaihnak taktak nan ngeih lawngah tuah duhnak lungthin na ngeih lai.
American chunmang:  American chunmang cu America na um chung paoh cu na ngeih khawh ko lai.

Pathian chunmang:  Pathian chunmang timi cu minung sinak in ngeih khawhmi a si lo, Pathian dawtnak thawng lawng in ngeih khawhmi a si. (Deut 7:7)
American chunmang: American chunmang cu kan duh ti paoh in ngeih a ngah.

Pathian chunmang: Khrih ca rianṭuan thiah nan si tikah, a zumh lei lawng hi si loin a ca i temhinnak hmuh ding zong hi a si chih.(Philippians 1:29)
American chunmang:  Kan tuar awk si? Zeitin e? Pathian nih a temtuar ding ah a kan siang lo.  Khrih cu ka zumh lai nain a caah cun kan tuar lai lo.

Hi tiin ka tial ruang ah kha ti hin rak ruat sual hlah u: Pastor a si loah missionary a rian tuan ding kan si dih awk a si ka tinak a si lo. Kan tangka bank ah kan chiah awk a si lo ka tinak a si lo.  U.S citizen kan si awk a si lo ka tinak zong a si lo.  Doctor, Engineer, le a dangdang kan si awk a si lo ka tinak si lo.

Ka chim duhmi cu Pathian hi kan agenda ah chiah i zuam hna hlah u sih.  Kan nunnak ah number 2nd ah chia hna hlah u sih.  Amah duhnak hi kan duhnak dilak ah chia hna u sih .  These lak i inn sak cu i tiim hna hlah u sih.  A kan khamh hnu zongah amah he i pehtlaih khawhnak caanttha a kan pekmi hi kan i nuamhtuk awk a si.  Pathian nih vawlei hi a ningpi in a ttawl khawh nain zeidah a tuah timi le zeitin dah a tuah timi kha a kan theihter cu leng ah, mah bantuk kamhnak tuanbia ah a kan telter ve. A min thangtthat si ko seh.

(Genesis 37) Joseph hi Pathian chunman le zaanmang a let kho tu zong a si.  Kum 17 a si lio ah mang pahnih a manh: Pakhat cu a ule te a hmai i an kuunnak kong kha a si i a pahnihnak cu a nu le a pa a hmai i an kuunnak kong kha a si.  Mah pawl kha amah tein a manhmi a mang an si lo, Pathian nih a manh termi a mang an si.  A mang kha a cang colh maw? Cang colh hlha.  A cang ding vialte a thei dih tiah maw? Thei dih hla.  Amah a tlinnak hnga ding ah a awngmin maw? Awngmin hlah.  A phi cu kum 22 a rauh hnu ah kan hmuh.  Kan hmuhmi bal te cu Pathian sinah zumhawktlak tein a um, Pathian duhnak kha a pakhatnak a chiah.  Thawnginn ah harnak tampi a tong,  Potiphar nupi nih a tukforhnak in a luat i a ule nih a zuar a si nain a mang a rak manhmi a tlin hlan paoh cu a lung dong lo tein a um.  Joseph tuanbia kan zoh tikah zeitik ah Pathian chunmang kong zeidah kan theih? Joseph nih a chung le mangttaam cung in a khamh hna Judahmi (a upa zong) a khamh hna. (genesis 49:8-10). Le Bawi Jesuh cu Judahmi chan in a chuahmi asi. Mah vialte a ti khawhnak kha cu a chunmang kha Pathian chunmang a si caah a si.

Pathian chunmang a manh tu maw na si lai?  Pathian zumhawktlak sal ttha na si lai maw? Pathian nih bible a kan pekmi hi kan i lawmh tuk awk a si (Joseph nih a rak ngei kho lo).  Bible nih cun zeitluk in dah Pathian chunmang a hmanh tu si hi a tthat timi a kan chimh.  A caan caan ah cun Setan nih innka a on tawn.  A caan caan ah cun no kan ti i tei kan maak a hau.  Mah ruangah cun pei Bible kan herh cu.  Pathian duhmi kan theih khawh nakhnga Bible kan hau.  Pathian chunmang cu Bible chungah hmuh khawh a si.  *http://cfchome.org/resources/i-have-dream* ” mah link ah hin Pastor Min Chung nih phung a chimnak video tawite ngaih khawh a si.

Joseph a hlawhtlinnak lawngte kha zoh loin zeitluk in dah zumhawk tlak mipa a rak si ti tu kha zoh deuh hna u sih.  ” American Dream”  kong he pehtlai in tahchunhnak i a ttha ngaimi cu,  Biaknak buaibainak a um ruang i England in USA a rak rami, Puritan, kong kha a si.  An ram i biaknak a kal ning an lung a tlin lo tikah, an ram an chuah taak.  An ram ah cathiam lo zong an si lo, tangka ngei lo zong an si lo nain zumhnak he America ah a kal.  Mah Khrihfa pawl an chunmang cu a rawk tuk cangmi vawlei pi remh tthan hi a si.   Mah chunmang an ngeih khawhnak a ruang cu zumhnak an ngeih ruangah a si.   Mah an zumhnak cu American Khrihfami (Protestant) le Americanmi caah ro a si.

Laimi phun le a dang mipeem pawl nih Pathian thawngttha kan theih taktak khawhnak hnga ka si khawh chung in thla ka cam.  Pathian nih amah ka theihtu taktak cawisang hna sehlaw, texi mawngtu, sehzung rianttuantu, doctor, innthianhtu, sushi tuahtu, engineer, nau umtu, nurse, sihni, a phunphun siter hna seh law tiah Pathian sinah thla ka cam.  Chunmang ngan pi pi ngeih hi a ttha a ziah tiah cun caan ttha tam deuh kan ngei nain kan chun mang pawl cu Pathian kan dawtnak lawnglawng in a rami si seh.– tangka, minthannak, kanmah, kan pawkam, a si loah kan u le kan pa caah si hna hlah seh.  Kan chunmang cu vawlei in si loin cung lei in a rami chunmang si hram seh.  Kan chunmang hna cu kan nunnak ah thiang thlarau in ra sehlaw, Pathian a dawh tertu si hram ko seh. Pathian nih a chunmang rak kan pe sehlaw, a Bia in rak kan hruai ko seh.

Thil pakhat ka chim khawhmi cu, Pathian he pehtlaihnak a hmanmi na ngeih lo asi loah Bible na lungthin tak in na dawt lo ahcun, nangmah le nangmah nai hngalh lo bia a si.  Zaangfahnak tein Pathian kawl hmasa,  na nunnak ah chunmang ttha bik na ngeih khawhnak hnga caah dawh kna caah Khrih nih a nunnnak a pek cuh.

American chunmang nakin Pathian chunmang a manhtu tu si u sih.

Mattew 16:26  Mi pakhat nih vawlei pi hi co dih sehlaw, a nunnak sung ttung sehlaw, a miaknak a um hnga maw?

Galations 5:13  Ka u le ka nau hna, nannih cu luat dingin kawhmi nan si. Asinain cu luatnak cu nan pumsa duhnak ca i caan ṭha men ah khan hmang hlah u. Pakhat le pakhat kha dawtnak in nan rian tu i bawm u.

1 Corinthians 10:23-24 ” 23sihmanhsehlaw kannih nih cun vailamtahnak cung i thahmi Khrih kong kha kan chim i cu kong cu Judah mi caah cun tluknak lung a si i Grik mi hna caah cun hruhnak bia a si. 24Sihmanhsehlaw Pathian nih a kawhmi hna caah cun, Judah mi an si zongah Jentail mi an si zongah, cu bia cu Khrih kha a si i Khrih cu Pathian hmual le Pathian fimnak kha a si.

Kei atu chunmang pakhat ka nei, chunmang taktak, i thihpi a phu mi chunmang,  Pathian sunparnak caah nun hi a si.  ziah tiah cun amah caah pei sermi ka rak si cu. Amen.

van lian ceu (chicago).

Kingdom (Pennak) kha Pathian tiin ka leh i rak ka ngaithiam u tiah zaangfah kan nawl hna.

Laica in a ka leh peih tu Benjamin Cunglian cungah lawmhnak tampi ka nei!

Facebook Comments

You Might Also Like

1 Comment

Leave a Reply

%d bloggers like this: